បាល់ទាត់៖ ក្រុមបឹងកេតបានធ្វើឲ្យអ្នកគាំទ្របាល់ទាត់ជាតិមានការភ្ញាក់ផ្អើលជាខ្លាំង ក្រោយកែប្រែទម្រង់លេងដ៏ល្អដើម្បីសងសឹកក្រុមវិសាខាវិញ ដោយលទ្ធផល ២-១ បន្ទាប់ពីក្រុមនាគខៀវបានរងបរាជ័យក្នុងដីយ៉ាងធ្ងន់ធ្ងរ ៥-១ ក្នុងការប្រកួតបញ្ចប់ជុំទី១ នៃលីគកំពូលកម្ពុជាកាលពីពេលកន្លងទៅ។
ជំនួបជើងទី២ នៅកីឡដ្ឋានព្រីនស៍នេះ បឹងកេតបានបង្ហាញនូវទម្រង់លេងដ៏ភ្ញាក់ផ្អើល ផ្ទុយពីទម្រង់លេងលើទឹកដីរបស់ខ្លួន ដោយពួកគេបានស៊ុតបំប៉ោងសំណាញ់ទីក្រុមម្ចាស់ផ្ទះ ២គ្រាប់មុនដោយខ្សែប្រយុទ្ធជួរមុខ ចាន់ វឌ្ឍនាកា ម្នាក់ឯងនៅនាទី២៥ និងនាទី៣០។ ចូលវគ្គទី២ ក្រុមទាំងពីរបានព្យាយាមដាក់សម្ពាធគ្នាកាន់តែខ្លាំង ពិសេសក្រុមម្ចាស់ផ្ទះដែលបានផ្លាស់ប្ដូរកម្លាំងថ្មីរបស់ខ្លួន ដូចជាកីឡាករប្រេស៊ីល Cristian Alex, កីឡាករកូរ៉េខាងត្បូង Lee Jaegun និងអតីតខ្សែការពារបឹងកេត ទេស សម្បត្តិ ជាដើម តែពួកគេវាយបកបានតែ ១គ្រាប់ប៉ុណ្ណោះ នៅនាទី៥៨ ដោយកីឡាករ Cristian Alex ហើយលទ្ធផលនេះក៏បានរក្សារហូតដល់ចប់ការប្រកួត។
ទោះបីមិនអាចសងសឹកបានច្រើនគ្រាប់ ដូចវិសាខាឈ្នះលើក្រុមខ្លួន តែជ័យជម្នះរបស់ក្រុមបឹងកេតនេះបានទទួលការកោតសរសើរ ស្ទើរគ្រប់មាត់ពីបណ្ដាអ្នកគាំទ្រ និងអ្នកជំនាញបាល់ទាត់ ពិសេសការកែប្រែនូវទម្រង់លេងដ៏អាក្រក់ពីសំណាក់គ្រូបង្វឹកលោក គីម ភក្ដី ដែលធ្វើឲ្យក្រុមខ្លួនអាចយកឈ្នះ និងបញ្ចប់កំណត់ត្រាមិនស្គាល់ចាញ់របស់វិសាខា ក្នុងលទ្ធផល ២-១ នៅកីឡដ្ឋានព្រីនស៍។ ជ័យជម្នះនេះដែរបានធ្វើឲ្យបឹងកេតបន្ដឈរលេខ៥ តែមាន ២៧ពិន្ទុចាញ់ប្រៀបបេក្ខភាពក្រុមកំពូលតារាងព្រះខ័នរាជស្វាយរៀង វិសាខា ភ្នំពេញក្រោន និងណាហ្គាវើលដ៏តែ ១ពិន្ទុប៉ុណ្ណោះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
