អាជ្ញាធរក្នុងតំបន់បាននិយាយថា មនុស្ស ៤នាក់បានស្លាប់ និង ៩នាក់បានរងរបួសនៅក្នុងការបាញ់ប្រហារទ្រង់ទ្រាយធំនៅបរិវេណវិទ្យាល័យមួយក្នុងរដ្ឋ ចចា (Georgia) សហរដ្ឋអាមេរិក កាលពីថ្ងៃពុធ (០៤ កញ្ញា)។ អ្នកស្លាប់ទាំង ៤នាក់នោះគឺសិស្សពីរនាក់ និងគ្រូបង្រៀនពីរនាក់នៅវិទ្យាល័យ អាផាឡាឈី (Apalachee) ក្នុងទីក្រុង បារ៉ូ (Barrow) រដ្ឋ ចចា (Georgia) ចម្ងាយប្រហែល ៧០គីឡូម៉ែត្រភាគខាងជើងទីក្រុង អាត្លង់តា (Atlanta) ដែលជាក្រុងធំបំផុតរបស់រដ្ឋ។

លោក គ្រីស ហូសី (Chris Hosey) នាយកការិយាល័យស៊ើបអង្កេតរដ្ឋ ចចា (GBI) បានប្រាប់សន្និសីទសារព័ត៌មាននៅរសៀលថ្ងៃពុធថា ឃាតករត្រូវបានគេកំណត់អត្តសញ្ញាណថាជាក្មេងប្រុសវ័យ ១៤ឆ្នាំឈ្មោះ ខូល ហ្គ្រេ (Colt Gray) ជាសិស្សនៅវិទ្យាល័យនោះ។ ក្មេងប្រុសនោះបានបើកការបាញ់ប្រហារនៅមុនម៉ោង ១០:៣០ព្រឹក ហើយក៏បានប្រគល់ខ្លួនអោយនគរបាលភ្លាមៗនៅពេលត្រូវឡោមព័ទ្ធ។

លោក Hosey បន្ថែមថា មនុស្ស ៩នាក់ផ្សេងទៀតដែលរងរបួសត្រូវបានគេបញ្ជូនទៅមន្ទីរពេទ្យ ហើយអ្នកបាញ់ប្រហារនោះនឹងត្រូវចោទប្រកាន់ពីបទមនុស្សឃាត ហើយនឹងត្រូវកាត់ទោសក្នុងនាមជាមនុស្សពេញវ័យ។ សមត្ថកិច្ចកំពុងសួរនាំជនសង្ស័យ ប៉ុន្តែពួកគេមិនបានប្រាប់ពីមូលហេតុជំរុញលើការបាញ់ប្រហារនេះនៅឡើយទេ។

ប្រធានាធិបតីអាមេរិក លោក Joe Biden រួមទាំងអ្នកនយោបាយជាន់ខ្ពស់ជាច្រើនទៀត បានថ្កោលទោសការបាញ់ប្រហារដ៏ឃោរឃៅនេះ។ យោងតាមទីភ្នាក់ងារតាមដានហិង្សាដោយកាំភ្លើង Gun Violence Archive បានបង្ហាញថា នៅឆ្នាំ២០២៤នេះ អាមេរិក មានការបាញ់ប្រហារទ្រង់ទ្រាយធំជាង ៣៨០ករណីនៅទូទាំងប្រទេស។ ឧបទ្ទវហេតុដែលត្រូវបានកំណត់ថាជាការបាញ់ប្រហារទ្រង់ទ្រាយធំ គឺពាក់ព័ន្ធនឹងជនរងគ្រោះយ៉ាងហោចណាស់ ៤នាក់ ឬច្រើនជាងនេះត្រូវបានបាញ់ចំ ឬបាញ់សម្លាប់៕