នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) កាលពីថ្ងៃពុធ (០៤ កញ្ញា) បានបន្តទទូចលើគោលជំហរខ្លួនថា អ៊ីស្រាអែលនឹងយល់ព្រមចំពោះបទឈប់បាញ់អចិន្ត្រៃយ៍ណាមួយនៅក្នុងតំបន់ហ្កាហ្សា ដែលធានាថាតំបន់ព្រំដែនរវាងភាគខាងត្បូងហ្កាហ្សា និងអេហ្ស៊ីប មិនអាចប្រើជាខ្សែជីវិតសម្រាប់ចលនាអ៊ីស្លាមហាម៉ាសបានទៀត។

លោក Netanyahu បានច្រានចោលទាំងស្រុងនូវការដកទ័ពចេញពីច្រករបៀង ហ្វីឡាឌែលហ្វៀ (Philadelphia) នៅក្នុងដំណាក់កាលដំបូងនៃកិច្ចព្រមព្រៀង ដែលរំពឹងថានឹងមានរយៈពេល ៤២ថ្ងៃ ដោយនិយាយថាសម្ពាធអន្តរជាតិនឹងធ្វើឱ្យខ្លួនមិនអាចត្រឡប់ទៅវិញបាន។

សម្រាប់បទឈប់បាញ់អចិន្ត្រៃយ៍ដែលត្រូវព្រមព្រៀងគ្នាបន្ទាប់ពីនោះ អ៊ីស្រាអែលត្រូវការការធានាថា ភាគីណាក៏ដោយដែលគ្រប់គ្រងហ្កាហ្សាក្រោយសង្រ្គាម នឹងអាចរារាំងច្រករបៀងនេះមិនឱ្យប្រើប្រាស់ជាផ្លូវសម្រាប់ការរត់ពន្ធអាវុធ និងការផ្គត់ផ្គង់សម្រាប់ក្រុមហាម៉ាស។

ច្រករបៀង Philadelphia តាមបណ្តោយជាយខាងត្បូងនៃតំបន់ហ្កាហ្សា ជាប់ព្រំដែនអេហ្ស៊ីប គឺជាឧបសគ្គចម្បងមួយចំពោះកិច្ចព្រមព្រៀងបញ្ឈប់ការប្រយុទ្ធគ្នានៅតំបន់ហ្កាហ្សា និងនាំយកចំណាប់ថ្នូរអ៊ីស្រាអែលត្រឡប់ទៅវិញជាថ្នូរនឹងអ្នកទោសប៉ាឡេស្ទីន។

លោក Netanyahu បានទទូចរក្សាការគ្រប់គ្រងលើច្រករបៀងនេះ ជាទីដែលកងទ័ពអ៊ីស្រាអែលបានរកឃើញផ្លូវរូងក្រោមដីរាប់សិបកន្លែង ដែលក្រុមមន្ត្រីនិយាយថា ត្រូវបានប្រើដើម្បីផ្គត់ផ្គង់ដល់ក្រុមហាម៉ាសជាមួយនឹងអាវុធ និងគ្រាប់រំសេវ៕