អាជ្ញាធរការពារជាតិកោះតៃវ៉ាន់បាននិយាយកាលពីថ្ងៃពុធ (០៤ កញ្ញា) ថា ខ្លួនកំពុងតាមដានសមយុទ្ធឡើងគោករបស់ប្រទេសចិន ដែលធ្វើឡើងនៅក្នុងខេត្តមួយស្ថិតនៅទល់មុខកោះនៅម្ខាងទៀតនៃច្រកសមុទ្រតៃវ៉ាន់ ជាទីដែលសមយុទ្ធបែបនេះពីមុនធ្លាប់បានធ្វើឡើង។

ប្រទេសចិន ដែលចាត់ទុកកោះស្វ័យគ្រប់គ្រងតៃវ៉ាន់ថាជាទឹកដីរបស់ខ្លួន បានបង្កើនសម្ពាធផ្នែកយោធា និងនយោបាយក្នុងរយៈពេលប្រាំឆ្នាំចុងក្រោយនេះដើម្បីបញ្ជាក់ការអះអាងរបស់ខ្លួន ដែលទីក្រុងតៃប៉ិ បដិសេធយ៉ាងខ្លាំង។

អាជ្ញាធរការពារជាតិតៃវ៉ាន់ បាននិយាយនៅក្នុងសេចក្តីថ្លែងការណ៍មួយថា ចាប់តាំងពីថ្ងៃអង្គារមក ខ្លួនបានរកឃើញយន្តហោះចម្បាំង ឧទ្ធម្ភាគចក្រ យានដ្រូន នាវាថលជលិកយាន និងនាវាផ្ទុកយានរបស់ចិន ដោយមានទាហានជើងគោក កំពុងធ្វើ “សមយុទ្ធឡើងគោករួមគ្នា”។ អាជ្ញាធរនោះបន្តថា សមយុទ្ធកំពុងធ្វើឡើងនៅជុំវិញឆ្នេរ តាឆឹង (Dacheng) ក្នុងខេត្ត ហ្វ៊ូជាន (Fujian) ភាគអាគ្នេយ៍ប្រទេសចិន ដែលទល់មុខនឹងកោះតៃវ៉ាន់ ដោយបន្ថែមថាខ្លួនកំពុងតាមដានស្ថានការណ៍យ៉ាងដិតដល់។

កោះតៃវ៉ាន់ កាលពីឆ្នាំមុនៗប្រហែលខែកញ្ញាដូចគ្នានេះ បានរកឃើញសមយុទ្ធរបស់ចិនស្រដៀងគ្នានៅទីតាំងដដែលនោះ។ ចិនបានរៀបចំហ្គេមសង្គ្រាមទ្រង់ទ្រាយធំលើកចុងក្រោយជុំវិញកោះតៃវ៉ាន់ក្នុងខែឧសភា មិនយូរប៉ុន្មានបន្ទាប់ពីលោក ឡៃ ឆឹងទ័រ (Lai Ching-te) ឡើងកាន់តំណែងជាមេដឹកនាំថ្មីរបស់កោះ ដែលទីក្រុងប៉េកាំង ហៅលោកថាជាជនផ្ដាច់ខ្លួនដ៏គ្រោះថ្នាក់៕