ប្រធានអង្គការសុខភាពពិភពលោក (WHO) បាននិយាយកាលពីថ្ងៃពុធទី៤ ខែកញ្ញា ថា សាធារណរដ្ឋប្រជាធិបតេយ្យកុងហ្គោ រំពឹងថានឹងទទួលបានការដឹកជញ្ជូនវ៉ាក់សាំងជំងឺអុតស្វា(mpox) លើកដំបូងរបស់ខ្លួន នៅថ្ងៃព្រហស្បតិ៍ ទី៥ ខែកញ្ញា នេះ ។

ប្រទេសកុងហ្គោ គឺជាចំណុចកណ្តាលនៃការផ្ទុះឡើងជំងឺអុតស្វា(mpox) ដែលអង្គការសុខភាពពិភពលោក បានប្រកាសថាជាគ្រាអាសន្នសុខភាពសាធារណៈសកលកាលពីខែមុន ប៉ុន្តែកិច្ចខិតខំប្រឹងប្រែងដើម្បីទប់ស្កាត់ការរាលដាលនៃជំងឺនេះ ត្រូវបានរារាំងដោយកង្វះវ៉ាក់សាំង។

អគ្គនាយកអង្គការសុខភាពពិភពលោក(WHO) លោក Tedros Adhanom Ghebreyesus បាននិយាយថា វ៉ាក់សាំងដំបូង នឹងទៅដល់នៅថ្ងៃព្រហស្បតិ៍ ទី៥ ខែកញ្ញានេះ ហើយរដ្ឋាភិបាលកុងហ្គោ គ្រោងនឹងចាប់ផ្តើមចែកចាយវ៉ាក់សាំងនៅចុងសប្តាហ៍។

ការទៅដល់នៃដូសវ៉ាក់សាំង នឹងជួយដោះស្រាយវិសមភាពដ៏ធំ ដែលបានធ្វើឱ្យបណ្តាប្រទេសនៅទ្វីបអាហ្រ្វិក គ្មានលទ្ធភាពទទួលបានការចាក់វ៉ាក់សាំងពីរដូសដែលត្រូវបានប្រើប្រាស់នៅក្នុងពេលផ្ទុះឡើងជំងឺអុតស្វា(mpox) ជាសកល កាលពីឆ្នាំ២០២២ ខណៈវ៉ាក់សាំងត្រូវបានប្រើប្រាស់យ៉ាងទូលំទូលាយនៅអឺរ៉ុប និងនៅសហរដ្ឋអាមេរិក។

ទីក្រុងវ៉ាស៊ីនតោន និងទីក្រុងប្រ៊ុចសែល បានសន្យាថានឹងផ្តល់វ៉ាក់សាំងរាប់ម៉ឺនដូស ដែលផលិតដោយក្រុមហ៊ុន Bavarian Nordic និងបាននិយាយថា វ៉ាក់សាំងអាចនឹងត្រូវបានដឹកជញ្ជូនក្នុងពេលឆាប់ៗនេះ។

លោកស្រី Maria Van Kerkhove នាយកស្តីទីនៃអង្គការសុខភាពពិភពលោក ទទួលបន្ទុកផ្នែកជំងឺឆ្លង និងបង្ការជំងឺ បាននិយាយថា ទីភ្នាក់ងារនេះ បានមើលឃើញ «ការកើនឡើងយ៉ាងឆាប់រហ័ស» នៅក្នុងសាធារណៈរដ្ឋប្រជាធិបតេយ្យកុងហ្គោ ហើយយើងមានការព្រួយបារម្ភថា ករណីឆ្លងនៅក្នុងប្រទេសប៊ូរុនឌី ដែលនៅជិតខាងគឺខ្ពស់ជាងអ្វីដែលបានរាយការណ៍រហូតមកដល់ពេលនេះ។