ប្រតិបត្តិការយោធារបស់អ៊ីស្រាអែលនៅទូទាំងតំបន់វេសបែង(West Bank) ដែលបានចាប់ផ្តើមមួយ សប្តាហ៍មុន បានសម្លាប់ជនជាតិប៉ាឡេស្ទីន ៣៣នាក់ និង ប្រហែល ១៤០នាក់ បានរងរបួស គិតត្រឹមថ្ងៃពុធ។ បើយោងតាមក្រសួងសុខាភិបាលប៉ាឡេស្ទីន។

ក្រសួងដែលមានមូលដ្ឋាននៅទីក្រុងរ៉ាម៉ាឡា ( Ramallah) បាននិយាយនៅក្នុងសេចក្តីថ្លែងការណ៍មួយថា អ្នកស្លាប់រួមមានជនជាតិប៉ាឡេស្ទីន ១៩នាក់ នៅទីក្រុងជេនីន ( Jenin) ៤នាក់នៅទីក្រុង Tubas និង ៧នាក់ នៅទីក្រុង Tulkarm ដែលទាំងអស់មានទីតាំងនៅភាគខាងជើងតំបន់វេសបែង និង ៣នាក់ទៀតនៅទីក្រុង Hebron នៅភាគខាងត្បូង។

ទីភ្នាក់ងារព័ត៌មានផ្លូវការរបស់ប៉ាឡេស្ទីន WAFA បានរាយការណ៍ថា កងកម្លាំងអ៊ីស្រាអែល បានបន្តប្រតិបត្តិការរបស់ពួកគេប្រឆាំងនឹងទីក្រុងជេនីន និងជំរំនៅក្នុងទីក្រុងនេះ សម្រាប់រយៈពេល ៨ថ្ងៃជាប់ៗគ្នា កាលពីថ្ងៃពុធ។

សារព័ត៌មាន WAFA បាននិយាយថា ប្រតិបត្តិការនេះ បានបណ្តាលឲ្យមានការបំផ្លិចបំផ្លាញយ៉ាងច្រើន នៃហេដ្ឋារចនាសម្ព័ន្ធ រួមទាំងបណ្តាញទឹក និងអគ្គិសនី ក៏ដូចជាការខូចខាតទ្រព្យសម្បត្តិជនស៊ីវិលផងដែរ។

លោក Philippe Lazzarini អគ្គស្នងការនៃទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន នៅតំបន់ដើមបូព៌ា បាននិយាយកាលពីថ្ងៃអង្គារថា ទីក្រុងជេនីន ត្រូវបានរងការខូចខាតដោយអំពើហិង្សា និងការបំផ្លិចបំផ្លាញ។