អ្នកនាំពាក្យរបស់នាយករដ្ឋមន្ត្រី ហ្ការី កូនីល (Garry Conille) បាននិយាយកាលពីថ្ងៃពុធ (០៤ កញ្ញា) ថា ហៃទីបានពង្រីកភាពអាសន្នរបស់ខ្លួនដោយគ្របដណ្តប់លើទឹកដីទាំងមូល ខណៈប្រទេសសមុទ្រការ៉ាអ៊ីបមួយនេះបន្តប្រយុទ្ធប្រឆាំងនឹងអំពើហិង្សាក្រុមជនអន្ធពាល ដែលបានកាន់កាប់ផ្នែកជាច្រើននៃរដ្ឋធានី ហើយបានរាលដាលទៅក្នុងតំបន់ក្បែរនោះ។

តំបន់មានប្រជាជនច្រើន វ៉េស (Ouest) របស់ហៃទី ជាទីដែលរដ្ឋធានីព័រអូប្រាំងស្ថិតនៅនោះ ត្រូវបានដាក់ក្នុងភាពអាសន្នកាលពីថ្ងៃទី០៣ ខែមីនា ក្រោមការគ្រប់គ្រងរបស់អតីតនាយករដ្ឋមន្រ្តី អារីយែល ហង់រី (Ariel Henry) ខណៈការកើនឡើងយ៉ាងខ្លាំងនៃអំពើហិង្សាបានធ្វើឱ្យកក្រើកទីក្រុង ហើយអ្នកទោសរាប់ពាន់នាក់បានរត់គេចខ្លួននៅក្នុងការហែកពន្ធនាគារចំនួនពីរ។

ភាពអាសន្នត្រូវបានបន្តជាថ្មីម្តងហើយម្តងទៀត ហើយតំបន់ផ្សេងៗទៀតត្រូវបានដាក់បញ្ចូលបន្ថែម រួមទាំងតំបន់កសិកម្ម អាទីបូនីត (Artibonite) ដែលរងអំពើហិង្សាដ៏អាក្រក់បំផុត តំបន់កណ្ដាល និងតំបន់នីប (Nippes) នៅឧបទ្វីបភាគខាងត្បូង។

សេចក្ដីប្រកាសនេះធ្វើឡើងមួយថ្ងៃមុនដំណើរទស្សនកិច្ចដែលគ្រោងទុករបស់រដ្ឋមន្ត្រីការបរទេសអាមេរិក លោក អង់តូនី ប្លីងខិន (Antony Blinken)។ មនុស្សជិត ៥៨០.០០០នាក់ត្រូវបានជម្លៀសដោយជម្លោះផ្ទៃក្នុងនេះ ហើយរាប់រយពាន់នាក់ត្រូវបាននិរទេសត្រឡប់ទៅហៃទីវិញ ដោយមនុស្សជិត ៥លាននាក់កំពុងប្រឈមនឹងភាពអត់ឃ្លានធ្ងន់ធ្ងរ៕