ប្រធានាធិបតីប៉ាឡេស្ទីនកាលពីថ្ងៃអង្គារ បានបញ្ជាក់ឡើងវិញនូវការបដិសេធរបស់ខ្លួនចំពោះវត្តមានយោធាអ៊ីស្រាអែល នៅតាមច្រករបៀងហ្វីឡាដែលហ្វៀ (Philadelphia) ឬនៅច្រកឆ្លងកាត់រ៉ាហ្វា (Rafah) នៅតាមព្រំដែនអេហ្ស៊ីប-ហ្កាហ្សា។

ទីភ្នាក់ងាររាយការណ៍ WAFA បានរវាយការណ៍ថា ក្នុងសេចក្តីថ្លែងការណ៍មួយ ប្រធានអាជ្ញាធរ ប៉ាឡេ ស្ទីន បានរិះគន់ការអត្ថាធិប្បាយរបស់នាយករដ្ឋមន្ត្រីអ៊ីស្រាអែល លោកបេនចាមីន ណេតាន់យ៉ាហ៊ូ (Benjamin Netanyahu) អំពីការរត់ពន្ធអាវុធពីប្រទេសអេហ្ស៊ីប ចូលទៅក្នុងតំបន់ហ្គាហ្សា ដោយចោទប្រកាន់គាត់ថា បានប្រើការអះអាងដើម្បីរំខានដល់សាធារណជន ចៀសវាងកិច្ចព្រមព្រៀងបទឈប់បាញ់ និងបន្តសកម្មភាពយោធាប្រឆាំងនឹងប្រជាជនប៉ាឡេស្ទីន។

ប្រធានអាជ្ញាធរប៉ាឡេស្ទីន ក៏បានសម្តែងការពេញចិត្តចំពោះគោលជំហររបស់អេហ្ស៊ីបប្រឆាំងនឹងការជម្លៀសប្រជាជនប៉ាឡេស្ទីន និងបានអះអាងជាថ្មីពីការជំទាស់របស់ខ្លួនចំពោះវត្តមានរបស់អ៊ីស្រាអែលនៅតាមច្រករបៀងហ្វីឡាដែលហ្វៀ។

លោក ណេតាន់យ៉ាហ៊ូ បាននិយាយកាលពីថ្ងៃចន្ទថា អ៊ីស្រាអែល នឹងមិនដកខ្លួនចេញពីច្រករបៀង ហ្វីឡាដែលហ្វៀ ឡើយ។ លោកបានបញ្ជាក់ថា៖«យើងត្រូវមានច្រករបៀបនេះ នៅក្រោមការគ្រប់គ្រងរបស់យើង» ដោយសង្កត់ធ្ងន់ថា វត្តមានរបស់អ៊ីស្រាអែលនៅទីនោះ មានសារៈសំខាន់ណាស់ក្នុងការទប់ស្កាត់ការរត់ពន្ធអាវុធនាពេលអនាគតពីអេហ្ស៊ីប ទៅកាន់តំបន់ហ្កាហ្សា។

ក្រសួងការបរទេសអេហ្ស៊ីប បានច្រានចោលការអះអាងរបស់អ៊ីស្រាអែលកាលពីថ្ងៃអង្គារ ដោយចោទប្រកាន់ភាគីអ៊ីស្រាអែលថា បានប្រើប្រាស់ការអះអាងនេះ ដើម្បីបង្ហាញពីភាពត្រឹមត្រូវនៃគោលនយោបាយ «ឈ្លានពាន និងបង្កហេតុ»របស់ខ្លួន។