នាយករដ្ឋមន្ត្រី Jonas Gahr Store បាននិយាយកាលពីថ្ងៃពុធថា ប្រទេសន័រវែស ត្រៀមខ្លួនជាស្រេច ដើម្បីធ្វើកិច្ចសហប្រតិបត្តិការជាមួយប្រទេសកាតា ទៅលើកិច្ចចរចាសន្តិភាព និងកិច្ចខិតខំប្រឹងប្រែងផ្សះផ្សា នៅមជ្ឈិមបូព៌ា។ ។

លោក Store បានធ្វើការអត្ថាធិប្បាយ បន្ទាប់ពីបានជួបជាមួយមេដឹកនាំកាតាដែលកំពុងបំពេញទស្សនកិច្ច លោក Emir Sheikh Tamim bin Hamad Al Thani ដែលកំពុងធ្វើដំណើរទៅកាន់តំបន់អឺរ៉ុបខាងជើង។ 

លោក Store បាននិយាយថា៖«ប្រទេសកាតា កំពុងដើរតួនាទីយ៉ាងសំខាន់នៅក្នុងការងារសន្តិភាព និងការផ្សះផ្សា ហើយយើងមានភាពជាដៃគូដ៏រឹងមាំ នៅក្នុងតំបន់នេះ»។

លោកបានថ្លែងថា៖«ប្រទេសន័រវែស គាំទ្រយ៉ាងពេញទំហឹងចំពោះកិច្ចខិតខំប្រឹងប្រែងដែលកំពុងបន្ត ដើម្បីបង្កើតបទឈប់បាញ់រវាងអ៊ីស្រាអែល និងក្រុមហាម៉ាស ហើយយើងចែករំលែកការព្រួយបារម្ភយ៉ាងខ្លាំងរបស់ប្រទេសកាតាចំពោះអស្ថិរភាពនៅក្នុងតំបន់»។

លោក Store ក៏បានគូសបញ្ជាក់ផងដែរអំពីភាពជាដៃគូដ៏រឹងមាំរវាងន័រវែស និងកាតា លើកិច្ចសហប្រតិបត្តិការរបស់ពួកគេ នៅក្នុងវិស័យចម្រុះ រួមទាំងការទូតសន្តិភាព ថាមពល ការផ្លាស់ប្តូរបៃតង និងធុរកិច្ច។