នៅក្នុងរបាយការណ៍មួយដែលបានចេញផ្សាយ នៅថ្ងៃព្រហស្បតិ៍ (ទី៥ ខែកញ្ញា) នេះ អង្គការសហប្រជាជាតិ (UN) បានឲ្យដឹងថា ការបង្កកខ្វក់ខ្យល់ភាគល្អិត បានធ្លាក់ចុះ នៅទ្វីបអឺរ៉ុប និងប្រទេសចិន ក្នុងឆ្នាំ២០២៣ ដោយសារការបំភាយឧស្ម័នដែលទាក់ទងនឹងសកម្មភាពរបស់មនុស្ស បានថមថយ។

គួរបញ្ជាក់ថា ភាគល្អិតណាណូដែលត្រូវបានស្គាល់ថា PM2.5 ដោយសារតែទំហំរបស់វាតូចជាង ២,៥មីក្រូម៉ែត្រ ក្នុងអង្កត់ផ្ចិត បង្កជាហានិភ័យធ្ងន់ធ្ងរដល់សុខភាព ប្រសិនបើស្រូបចូល ក្នុងរយៈពេលយូរ ដោយសារពួកវាតូចល្មមអាចចូលទៅក្នុងចរន្តឈាមបាន។ ភាគល្អិតទាំងនេះ បានកើតមានឡើងដោយសារសកម្មភាពរបស់មនុស្ស ដូចជាការឆេះឥន្ធនៈហ្វូស៊ីល ការដឹកជញ្ជូន និងឧស្សាហកម្ម ក៏ដូចជាចំហេះព្រៃ និងធូលីដីខ្សាច់ដែលបក់ដោយខ្យល់ផងដែរ។

វេជ្ជបណ្ឌិត លោក Lorenzo Labrador អ្នកវិទ្យាសាស្ត្រ នៅអង្គការឧតុនិយមពិភពលោក (WMO) បាននិយាយថា៖ «ទិន្នន័យឆ្នាំ២០២៣ បង្ហាញពីភាពមិនប្រក្រតីអវិជ្ជមាន ដែលមានន័យថា ការធ្លាក់ចុះនៃ PM2.5 បើប្រៀបធៀបទៅនឹងរយៈពេលយោងនៃឆ្នាំ ២០០៣-២០២៣ នៅប្រទេសចិន និងអឺរ៉ុប»។

នៅក្នុងព្រឹត្តិបត្រប្រចាំឆ្នាំដែលបានបោះពុម្ព មុនទិវាអន្តរជាតិនៃខ្យល់បិរសុទ្ធ សម្រាប់ផ្ទៃមេឃពណ៌ខៀវ នាថ្ងៃទី៧ ខែកញ្ញា ទីភ្នាក់ងារអង្គការសហប្រជាជាតិ បានសង្កត់ធ្ងន់ថា គុណភាពខ្យល់ និងការប្រែប្រួលអាកាសធាតុ មានទំនាក់ទំនងគ្នាយ៉ាងជិតស្និទ្ធ។

លោកវេជ្ជបណ្ឌិត Labrador បាននិយាយថា កម្រិតភាគល្អិតល្អ បានកើនឡើងនៅលើឧបទ្វីបឥណ្ឌា និងផ្នែកខ្លះនៃអាស៊ីអាគ្នេយ៍។ តែ WMO បានឲ្យដឹងថា ប្រទេសចិន និងអឺរ៉ុប បានកត់ត្រាកម្រិតទាបជាងមធ្យម៕