តម្លៃប្រេងបានហក់ឡើងបន្តិច បន្ទាប់ពីបានធ្លាក់ដល់កម្រិតទាបជាច្រើនខែ នៅមុននេះ ខណៈប្រទេសផលិតធំៗ អាចពន្យារពេលការបង្កើនទិន្នផលដែលបានគ្រោងទុក សម្រាប់ខែក្រោយ ហើយការស្តុករបស់សហរដ្ឋអាមេរិក បានធ្លាក់ចុះ ទោះបីជាការកើនឡើងនេះ ត្រូវបានកំណត់ដោយការព្រួយបារម្ភ អំពីតម្រូវការដែលកំពុងមានក៏ដោយ។

ហ៊ុនប្រេងឆៅម៉ាក Brent សម្រាប់ខែវិច្ឆិកា បានឡើង ១៥សេន ឬ ០.១ភាគរយ ដោយឡើងដល់តម្លៃ ៧២,៨៥ដុល្លារ នៅម៉ោង ៤:០២នាទី ម៉ោងសកល បន្ទាប់ពីបានធ្លាក់ចុះ ១,៤ភាគរយ ណៅក្នុងពេលជួញដូរមុន រហូតដល់ការបិទការជួញដូរ ក្នុងតម្លៃទាបបំផុត ចាប់តាំងពីថ្ងៃទី២៧ ខែមិថុនា ឆ្នាំ២០២៣។ ហ៊ុនប្រេងឆៅ West Texas Intermediate (WTI) របស់អាមេរិក សម្រាប់ខែតុលា បានឡើង ១៥សេន ឬ ០,២២ភាគរយ ដោយឡើងដល់ ៦៩,៣៥ដុល្លារ បន្ទាប់ពីបានធ្លាក់ថ្លៃ ១,៦ភាគរយ កាលពីថ្ងៃពុធ (ទី៤ ខែកញ្ញា) រហូតដល់ការទូទាត់ ក្នុងតម្លៃទាបបំផុត ចាប់តាំងពីថ្ងៃទី១១ ខែធ្នូ។

គួរបញ្ជាក់ថា អង្គការនៃប្រទេសនាំចេញប្រេង និងសម្ព័ន្ធមិត្តដែលដឹកនាំដោយប្រទេសរុស្ស៊ី ដែលត្រូវបានគេស្គាល់ថា OPEC+ កំពុងពិភាក្សាលើការពន្យារពេលការបង្កើនទិន្នផលប្រេងរបស់ខ្លួន ដែលគ្រោងនឹងចាប់ផ្តើម នៅក្នុងខែតុលា បន្ទាប់ពីតម្លៃបានឡើងថ្លៃ។ នេះបើតាមប្រភពចំនួន៤ ពីក្រុមអ្នកផលិត ដែលបានប្រាប់សារព័ត៌មាន Reuters កាលពីថ្ងៃពុធ។

កាលពីសប្តាហ៍មុន OPEC + បានត្រៀមដំណើរការដំឡើងទិន្នផលក្នុងចំនួន ១៨០.០០បារ៉ែល ក្នុងមួយថ្ងៃ នៅក្នុងខែតុលា ដែលជាផ្នែកនៃផែនការ ដើម្បីបន្ធូរបន្ថយជាបណ្តើរៗនូវការកាត់បន្ថយចុងក្រោយបំផុតចំនួន ២,២លានបារ៉ែល ក្នុងមួយថ្ងៃ។ ប៉ុន្តែការបញ្ចប់នាពេលខាងមុខ ចំពោះជម្លោះ ដែលបញ្ឈប់ការនាំចេញលីប៊ី និងតម្រូវការរបស់ចិន ក្នុងចំនួនតិចទួច បានជំរុញឲ្យក្រុមនេះពិចារណាឡើងវិញ។

តម្លៃនៅថ្ងៃព្រហស្បតិ៍នេះ ក៏បានឃើញមានការគាំទ្រផងដែរ បន្ទាប់ពីទិន្នន័យរបស់វិទ្យាស្ថានប្រេងអាមេរិក (API) បានបង្ហាញថា ស្តុកប្រេងឆៅ និងឥន្ធនៈរបស់សហរដ្ឋអាមេរិក បានធ្លាក់ចុះ កាលពីសប្តាហ៍មុន។ នេះបើយោងតាមប្រភពទីផ្សារដែលលើកឡើងពីតួលេខ API កាលពីថ្ងៃពុធ៕