នាយករដ្ឋមន្ត្រីម៉ាឡេស៊ី លោក Anwar Ibrahim នៅថ្ងៃព្រហស្បតិ៍ (ទី៥ ខែកញ្ញា) នេះ បាននិយាយថា ប្រទេសរបស់លោក នឹងមិនបញ្ឈប់ការរុករកប្រេង និងឧស្ម័នរបស់ខ្លួន នៅក្នុងសមុទ្រចិនខាងត្បូងនោះទេ បើទោះបីជាមានការអះអាងពីទីក្រុងប៉េកាំងថា ម៉ាឡេស៊ីកំពុងរំលោភលើដែនទឹករបស់ខ្លួនក៏ដោយ។

ដោយថ្លែងពីប្រទេសរុស្ស៊ី ជាកន្លែងដែលលោកកំពុងធ្វើដំណើរជាផ្លូវការនោះ លោក Anwar បានប្រាប់ថា សកម្មភាពរុករករបស់ម៉ាឡេស៊ី ស្ថិតនៅក្នុងដែនដីរបស់ខ្លួន ហើយមិនមានចេតនាបង្កហេតុ ឬអរិភាពចំពោះប្រទេសចិន ដែលប្រទេសនេះមានទំនាក់ទំនងមិត្តភាពជាមួយនោះទេ។

នៅក្នុងសន្និសីទសារព័ត៌មានតាមទូរទស្សន៍នៅទីក្រុង Vladivostok លោក Anwar បាននិយាយថា៖ «ជាការពិតណាស់ យើងនឹងត្រូវប្រតិបត្តិការ នៅក្នុងដែនទឹក និងធានានូវអត្ថប្រយោជន៍សេដ្ឋកិច្ចរបស់យើង ក្នុងនោះរួមទាំងការខួងយកប្រេង នៅក្នុងដែនដីរបស់យើងផងដែរ។ យើងមិនដែលបានបដិសេធលទ្ធភាពនៃការពិភាក្សា (ជាមួយប្រទេសចិន) នោះទេ។ ប៉ុន្តែវាមិនមែនមានន័យថា យើងត្រូវបញ្ឈប់ប្រតិបត្តិការនៅក្នុងតំបន់របស់យើងនោះទេ»។

ក្រសួងការបរទេសម៉ាឡេស៊ី កាលពីថ្ងៃពុធ (ទី៤ ខែកញ្ញា) បាននិយាយថា ខ្លួននឹងស៊ើបអង្កេតការបែកធ្លាយលិខិតការទូតសម្ងាត់ពីក្រសួងការបរទេសចិន។ ក្នុងលិខិតនោះដែលផ្សាយដោយសារព័ត៌មានហ្វីលីពីន ទីក្រុងប៉េកាំងបានអះអាងថា ការរុករកប្រេង និងឧស្ម័នរបស់ម៉ាឡេស៊ី នៅសមុទ្រចិនខាងត្បូង បានរំលោភលើដែនដីរបស់ខ្លួន។

គួរបញ្ជាក់ថា ប្រទេសចិនទាមទារអធិបតេយ្យភាពស្ទើរតែទាំងស្រុងនៃតំបន់របស់សមុទ្រចិនខាងត្បូងទាំងមូល ក្នុងនោះរួមទាំងផ្នែកខ្លះនៃតំបន់សេដ្ឋកិច្ចផ្តាច់មុខចម្ងាយ ២០០ម៉ាយល៍ណត់នៃប្រទេសហ្វីលីពីន ព្រុយណេ ម៉ាឡេស៊ី តៃវ៉ាន់ និងវៀតណាម ដែលបង្កឲ្យមានភាពស្មុគស្មាញដល់កិច្ចខិតខំប្រឹងប្រែងរុករកថាមពលដោយប្រទេសមួយចំនួន ក្នុងចំណោមប្រទេសទាំងនោះ៕