បាល់ទាត់៖ ក្រុមណាហ្គាវើលដ៏បានរក្សាកំណត់ត្រាឈ្នះទាំង ២ជើងលើក្រុមអង្គរថាយហ្គឺរបន្ទាប់ពីយកឈ្នះ ៤-២ ក្នុងជំនួបជើងទី២ នៃលីគកំពូលកម្ពុជាកាលពីចុងសប្ដាហ៍កន្លងទៅ ខណៈជើងទី១ ក្រុមលោក មាស ចាន់ណា បានយកឈ្នះក្រុមមានមូលដ្ឋាននៅខេត្ដសៀមរាបនេះដោយលទ្ធផល ២-១។
ការប្រកួតដំបូងនៅកីឡដ្ឋានស្ដាតចាស់ក្រោយការជួសជុស និងផ្លាស់ប្ដូរស្មៅថ្មីនេះ វគ្គទី១ ក្រុមទាំងពីរមិនអាចស៊ុតបំប៉ោងសំណាញ់ទីគ្នាបានឡើយ តែបន្ទាប់ពីចូលវគ្គទី១ បាន ៦នាទីក្រុមអង្គរថាយហ្គឺរក៏រកបានគ្រាប់បាល់នាំមុខ ១គ្រាប់មុនដែលធ្វើសម្រេចដោយកីឡាករ ឡុង ម៉េងហាវ នៅនាទី៥១។ ប៉ុន្ដែ ៥នាទីក្រោយមកក្រុមណាហ្គាវើលដ៏ក៏តាមស្មើវិញ ១-១ ដែលរកបានដោយកីឡាករ Marcio នៅនាទី៥៦ មុនអតីតក្រុមជើងឯកឆ្នាំ២០១៨ បន្ថែម ៣គ្រាប់ទៀតដោយកីឡាករ គួច ដានី នៅនាទី៦៧, Marcio នៅនាទី៨៩ និងកីឡាករ សុះ ស៊ូហាណា នៅនាទី៩០+៤ ខណៈអង្គរថាយហ្គឺរវាយបកបាន ១គ្រាប់ប៉ុណ្ណោះនៅចុងម៉ោងដោយកីឡាករ Da Cruz នៅនាទី៩០+២។
ជ័យជម្នះនេះបានធ្វើឲ្យក្រុមលោក មាស ចាន់ណា ក្លាយជាបេក្ខភាពលំដាប់កំពូលតារាងមួយ ក្នុងចំណោម ៤ក្រុមដែលមាន ២៨ពិន្ទុស្មើគ្នាជាមួយព្រះខ័នរាជស្វាយរៀង វិសាខា និងភ្នំពេញក្រោន បន្ទាប់ពីឆ្លងកាត់ ១៣ប្រកួតឈ្នះ៨ ស្មើ៤ និងចាញ់១។ រីឯអង្គរថាយហ្គឺរបានធ្លាក់មក ឈរលេខ៧ ដោយរក្សា ២១ពិន្ទុក្នុងដៃក្រោយឆ្លងកាត់ ១៣ប្រកួតឈ្នះ៦ ស្មើ៣ និងចាញ់៤ប្រកួត៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
