ប្រធានាធិបតីរបស់ប្រទេសកូឡុំប៊ី លោក Gustavo Petro កាលពីថ្ងៃពុធ (ទី៤ ខែកញ្ញា) បានស្នើឲ្យការិយាល័យអគ្គរដ្ឋអាជ្ញាស៊ើបអង្កេត ជុំវិញការទិញសូហ្វវែរចារកម្ម Pegasus តម្លៃ ១១លានដុល្លារ ដែលលោកបាននិយាយថា អាចត្រូវបានគេប្រើប្រាស់ ដើម្បីធ្វើចារកម្មលើអ្នកនយោបាយប្រឆាំង ក្នុងអំឡុងពេលរដ្ឋបាលមុន។

បច្ចេកវិទ្យាឈ្មោះ Spyware (ជាប្រភេទមេរោគក្នុងកុំព្យួទ័រ) ក្នុងនោះរួមទាំង Pegasus ត្រូវបានគេរកឃើញម្តងហើយម្តងទៀតថា ត្រូវបានប្រើប្រាស់ ដើម្បីលួចចូលទូរសព្ទរបស់សង្គមស៊ីវិល អ្នកនយោបាយប្រឆាំង និងអ្នកសារព័ត៌មាន ក្នុងទសវត្សរ៍ចុងក្រោយនេះ។ ជាពិសេស Pegasus Spyware ដែលបង្កើតដោយក្រុមហ៊ុនអ៊ីស្រាអែល NSO ត្រូវបានរកឃើញ នៅលើទូរសព្ទរបស់មនុស្សផ្សេងៗ ទូទាំងពិភពលោក ក្នុងនោះរួមទាំងអ្នកការពារសិទ្ធិមនុស្សផងដែរ។

ក្នុងអំឡុងពេលផ្សាយតាមទូរទស្សន៍ ដោយដកស្រង់ឯកសារដែលរៀបរាប់លម្អិតនូវការទិញនេះ ពីអង្គភាពព័ត៌មាន និងវិភាគ (UIAF) លោក Petro បានលើកជាសំណួរថា៖ «តើសាច់ប្រាក់ ១១លានដុល្លារចាកចេញពីប្រទេសដោយរបៀបណា តាមយន្តហោះមួយ ឬពីរ ពីការិយាល័យរដ្ឋ ទៅអ៊ីស្រាអែល ដើម្បីទិញសូហ្វវែរ (កម្មវិធី) ដែលធ្វើចារកម្មលើទូរសព្ទដៃទំនាក់ទំនងឯកជន អ្នកនយោបាយ អស់រយៈពេលរាប់ខែ?»។

លោកប្រធានាធិបតីបានចោទសួរបន្ថែមថា តើរូបលោក ឬអ្នកនយោបាយផ្សេងទៀត ត្រូវបានគេកំណត់គោលដៅ ឬអត់ ហើយនៅក្រោមហេតុផលផ្លូវច្បាប់អ្វី?

លោក Petro បានស្នើសុំឲ្យនាយក UIAF និងស្នងការនគរបាល បង្វែរឯកសារពាក់ព័ន្ធ និងសូហ្វវែរនេះទៅការិយាល័យអគ្គរដ្ឋអាជ្ញា ដើម្បីឲ្យប្រជាពលរដ្ឋអាចមានក្ដីរីករាយ ដែលថា សិទ្ធិរបស់ពួកគេត្រូវបានគោរពដោយរដ្ឋ៕