ក្រុមភ្នាក់ងារពន្លត់អគ្គិភ័យនៅជិតទីក្រុង Brasilia ប្រទេសប្រេស៊ីល បានព្យាយាមពន្លត់ភ្លើងឆេះព្រៃដែលបានឆាបឆេះដីព្រៃប្រហែល ២០ភាគរយនៅក្នុងទីក្រុងមួយនេះ អំឡុងរយៈពេល២ថ្ងៃកន្លងមកនេះ ហើយក្រុមមន្រ្តីសង្ស័យថា ករណីភ្លើងឆេះព្រៃនេះ ផ្តើមឡើងពីការលួចដុតព្រៃដោយចេតនា ។

លោក Godoy គឺជាភ្នាក់ងារពន្លត់អគ្គិភ័យមួយរូបនិយាយថា បច្ចុប្បន្នពួកយើងព្យាយាមការពារ និងគ្រប់គ្រងតំបន់កសិកម្ម ។

លោកបន្តថា ភ្លើងឆេះព្រៃ បានចាប់ផ្តើមការពីថ្ងៃម្សិលមិញ ហើយខ្យល់បក់ខ្លាំងបណ្តាលឲ្យភ្លើងឆេះព្រៃរីករាលដាលដល់ដីកសិកម្ម ។ បញ្ហាធំ នៅត្រង់ថា គ្មានផ្លូវទៅដល់ទីតាំងភ្លើងឆេះព្រៃនោះទេ ហើយតំបន់រងការឆាបឆេះ នៅខ្ពស់ប្រហែល ៥០ម៉ែត្រ និង ៦០ម៉ែត្រ ។

ភ្លើងឆេះព្រៃនេះដែរ បានកើតឡើងអំឡុងរដូវក្តៅ ធ្វើឲ្យវារីករាលដាលយ៉ាងឆាប់រហ័ស ។ ក្រុមភ្នាក់ងារពន្លត់អគ្គិភ័យ បានព្យាយាមពន្លត់ភ្លើងឆេះព្រៃ មុនពេលវារីករាលដាល់ដីកសិកម្ម ជាទីដែលក្រុមកសិករ ដាំប៉េងប៉ោះ និងផ្កា បើទោះបីជាខ្យល់បក់ខ្លាំង បង្កការលំបាកដល់ក្រុមភ្នាក់ងារពន្លត់អគ្គិភ័យ ក្នុងការទប់ស្កាត់វាក៏ដោយ ៕