ទិន្នន័យ កាលពីថ្ងៃពុធ (ទី៤ ខែកញ្ញា) បានបង្ហាញថា មន្ត្រីនគរបាល និងអ្នកពន្លត់អគ្គិភ័យវ័យក្មេង ក្នុងប្រទេសកូរ៉េខាងត្បូង កំពុងលាឈប់ពីការងារ ដោយសារបន្ទុកការងារធ្ងន់ធ្ងរ និងប្រាក់ខែទាប។

យោងតាមទិន្នន័យពីទីភ្នាក់ងារនគរបាលជាតិ ដែលបានដាក់ជូនតំណាងរាស្ត្រ លោក Shin Jung-hoon របស់គណបក្សប្រជាធិបតេយ្យកូរ៉េ បានបង្ហាញថា ចំនួនមន្រ្តីនគរបាលបម្រើការងារតិចជាង ១០ឆ្នាំដែលបានលាឈប់ពីការងារដោយស្ម័គ្រចិត្ត បានកើនឡើងជិតទ្វេដង ពីចំនួន ១៥៥នាក់ ក្នុងឆ្នាំ២០២២ ដល់ ៣០១នាក់ ក្នុងឆ្នាំ២០២៣។ 

ហើយអ្នកពន្លត់អគ្គិភ័យ ១២៥នាក់ ដែលបម្រើការងារតិចជាង ១០ឆ្នាំ បានលាឈប់ពីការងារ ក្នុងឆ្នាំ២០២៣ ធៀបនឹងចំនួន ៩៨នាក់ ក្នុងឆ្នាំ២០២២។

នៅត្រឹមតែពាក់កណ្តាលឆ្នាំ២០២៤ នគរបាលចំនួន ១៦២នាក់ និងអ្នកពន្លត់អគ្គិភ័យ ៦០នាក់ បានចាកចេញពីការងាររបស់ពួកគេរួចហើយ។ ចំនួននៃមន្ត្រីថ្នាក់ក្រោម ក្នុងចំណោមការលាឈប់ទាំងអស់ ក៏កំពុងកើនឡើងផងដែរ៕