ក្រុមហ៊ុនអវកាស Arianespace របស់អឺរ៉ុប បានបាញ់បង្ហោះរ៉ូកែត Vega ចុងក្រោយ ដោយបានដាក់ផ្កាយរណប Sentinel-2C ទៅក្នុងគន្លងតារាវិថី ដែលការបាញ់បង្ហោះនេះស្ថិតនៅក្រោមកម្មវិធី Copernicus របស់សហភាពអឺរ៉ុប ដើម្បីតាមដានបរិស្ថានរបស់ផែនដី។

រ៉ូកែតតួតែមួយតូចស្តើង ដែលមិនមានឧបករណ៍ជំរុញនៅពីចំហៀង ដូចយានធំៗ បានហោះឡើងទៅលើមេឃ ក្នុងពេលរាត្រី នៅឯមូលដ្ឋានបាញ់បង្ហោះ ក្នុងដែនដី French Guiana របស់ប្រទេសបារាំង នៅម៉ោង ១០:៥០នាទីយប់ (ម៉ោងក្នុងស្រុកថ្ងៃទី៤ ខែកញ្ញា)។ នេះបើតាមការបង្ហាញឲ្យឃើញពីរូបភាពដែលត្រូវបានផ្សាយបន្តផ្ទាល់តាមប្រព័ន្ធអ៊ិនអឺណិត។

ការបាញ់បង្ហោះនេះ បញ្ចប់អាជីពរយៈពេល ១២ឆ្នាំ សម្រាប់យានបាញ់បង្ហោះដ៏តូច ដែលត្រូវបានរចនាឡើងដោយក្រុមហ៊ុន Avio របស់អ៊ីតាលី។ យាននេះកំពុងត្រូវបានជំនួសដោយយាន Vega C ជំនាន់ថ្មីបំផុត ដែលគ្រោងនឹងត្រឡប់មកបម្រើសេវាកម្មវិញ នៅចុងឆ្នាំនេះ បន្ទាប់ពីត្រូវបានផ្អាក ក្រោយបរាជ័យ ក្នុងការបាញ់បង្ហោះ ដោយបណ្ដាលឲ្យមានការខូចខាតនូវផ្កាយរណបផ្ដល់រូបភាពដ៏មានឥទ្ធិពលចំនួន២ នៅក្នុងខែធ្នូ ឆ្នាំ២០២២។

ដោយត្រូវបានផលិតឡើងដោយក្រុមហ៊ុន Airbus Defense & Space ផ្កាយរណប Sentinel-2C នឹងជំនួស Sentinel-2A ជាផ្នែកមួយនៃផ្កាយរណបគូដែលកំពុងដំណើរការនៅក្នុងកម្មវិធី Copernicus៕