ប្រធានាធិបតី លោក Volodymyr Zelenskiy នៅថ្ងៃព្រហស្បតិ៍ (ទី៥ ខែកញ្ញា) នេះ បានស្នើទៅសភា ដើម្បីអះអាងពីការជ្រើសរើសអនុរដ្ឋមន្ត្រីការបរទេស លោក Andrii Sybiha ជារដ្ឋមន្ត្រីការបរទេសថ្មីរបស់ប្រទេសអ៊ុយក្រែន ដែលជាការតែងតាំងនៅក្នុងដំណាក់កាលដ៏សំខាន់ ក្នុងសម័យសង្គ្រាមជាមួយរុស្ស៊ី។

ការតែងតាំងលោក Sybiha ដែលសភាត្រូវបានគេរំពឹងថា នឹងអនុម័ត នៅយប់ថ្ងៃព្រហស្បតិ៍នេះ គឺជាផ្នែកមួយនៃការរុះរើដ៏ធំបំផុតក្នុងជួររដ្ឋាភិបាលអ៊ុយក្រែន គិតចាប់តាំងពីការចាប់ផ្តើមនៃសង្រ្គាម នៅក្នុងខែកុម្ភៈឆ្នាំ២០២២ ដោយលោក Zelenskiy បាននិយាយថា ប្រទេសនេះត្រូវការ «កម្លាំងថាមពលថ្មី»។

គួរបញ្ជាក់ថា សភាបានទទួលយកការលាលែងពីតំណែងរបស់រដ្ឋមន្ត្រីការបរទេស លោក Dmytro Kuleba ជារដ្ឋមន្ត្រីម្នាក់ ក្នុងចំណោមរដ្ឋមន្ត្រីរបស់អ៊ុយក្រែនដែលឈរនៅចំពោះមុខសាធារណជនច្រើនបំផុត។ ជាមួយគ្នានេះ សភាក៏បានអនុម័តផងដែរលើការលាលែងពីតំណែងរបស់ឧបនាយករដ្ឋមន្ត្រីពីររូប និងរដ្ឋមន្ត្រីមួយចំនួន ក្នុងរយៈពេល ២ថ្ងៃចុងក្រោយនេះ។

លោក Sybiha ដែលជាអ្នកការទូតអាជីព បានបម្រើការងារជាច្រើនឆ្នាំ នៅក្នុងការិយាល័យរបស់លោក Zelenskiy ដោយមើលការខុសត្រូវលើគោលនយោបាយការបរទេស និងភាពជាដៃគូយុទ្ធសាស្ត្រ។

អ្នកវិភាគបានលើកឡើងថា ពួកគេរំពឹងថា នឹងមិនមានការផ្លាស់ប្តូរ ក្នុងគោលនយោបាយការបរទេសរបស់អ៊ុយក្រែននោះទេ។ ក្នុងពេលមានសង្រ្គាមជាមួយរុស្ស៊ីនេះ រដ្ឋមន្ត្រីការបរទេសតែងតែមានតួនាទីលំដាប់ទី២ ចំពោះការិយាល័យប្រធានាធិបតី ពាក់ព័ន្ធនឹងបញ្ហាសំខាន់ៗជាច្រើននៃគោលនយោបាយការបរទេស៕