នៅថ្ងៃព្រហស្បតិ៍នេះ ប្រជាពលរដ្ឋរស់នៅក្នុងទីក្រុងហុងកុង នាំគ្នាត្រៀមបាវខ្សាច់ និងបិទបង្អួចផ្ទះ ជាការត្រៀមខ្លួនមុនការមកដល់របស់ព្យុះទីហ្វុង Yagi ។

ប្រជាពលរដ្ឋរស់នៅក្នុងតំបន់ Lei Yue Mun ជាកន្លែងដែលរងការជន់លិចអំឡុងពេលព្យុះទីហ្វុងលើកមុនៗនោះ បានត្រៀមខ្លួនខ្លាំងជាងគេ ។

នៅក្នុងចំណោមពួកគេមានទាំងលោក Kate Lee គឺជាម្ចាស់ហាងកាហ្វេ Ngan Lung ដែលហាងរបស់លោករងការជន់លិចយ៉ាងធ្ងន់ធ្ងរ អំឡុងពេលព្យុះទីហ្វុង Mangkhut កាលពីឆ្នាំ ២០១៨ ។

លោក Lee និយាយថា ពួកយើងបានត្រៀមខ្លួនច្រើនណាស់ ដូចជាលើកទំនិញចេញពីជាន់ដី ហើយនឹងរៀបចំបាវខ្សាច់ផងដែរ ដើម្បីការពារការជន់លិច ។

បោកបក់ក្នុងល្បឿន ២០៩គ.មក្នុង ១ម៉ោង ព្យុះទីហ្វុង Yagi ត្រូវបានចាត់ថ្នាក់ថាជាព្យុះស៊ីក្លូនត្រូពិកដ៏មានកម្លាំងខ្លាំងបំផុតទី ២របស់ពិភពលោកប្រចាំឆ្នាំ ២០២៤ មកទល់នឹងពេលនេះ បន្ទាប់ពីព្យុះកំណាចកម្រិតទី ៥ Beryl ៕