រដ្ឋាភិបាលហូឡង់បានប្រាប់ឲ្យដឹងថា ប្រទេសហូឡង់នឹងបង្កើនការចំណាយលើវិស័យការពារជាតិច្រើនជាង ១០ភាគរយ នៅឆ្នាំក្រោយ ដោយវិនិយោគលើរថក្រោះ យន្តហោះចម្បាំង នាវាចម្បាំង និងប្រព័ន្ធការពារដែនអាកាសថ្មី ដែលជាការជំរុញមួយ ដើម្បីពង្រឹងកងកម្លាំងរបស់ខ្លួន ក្នុងការទប់ទល់នឹងការគំរាមកំហែងផ្នែកសន្តិសុខថ្មី។

រដ្ឋាភិបាល នៅថ្ងៃព្រហស្បតិ៍ (ទី៥ ខែកញ្ញា) នេះ បាននិយាយថា ការចំណាយលើវិស័យការពារជាតិ នឹងត្រូវបានបង្កើនចំនួន ២,៤ពាន់លានអឺរ៉ូ (២,៧ពាន់លានដុល្លារ) ដោយនាំឲ្យថវិកាប្រចាំឆ្នាំឡើងដល់ប្រហែល ២៤ពាន់លានអឺរ៉ូ។

រដ្ឋមន្ត្រីការពារជាតិ លោក Ruben Brekelmans បាននិយាយថា៖ «ការគំរាមកំហែងថ្មីទាមទារឲ្យមានវិធានការ។ ការលុកលុយដោយគ្មានមេត្តារបស់រុស្ស៊ីទៅលើអ៊ុយក្រែន បង្ហាញថា ការវាយប្រហារលើសម្ព័ន្ធមិត្តអង្គការណាតូ គឺមិនអាចមិនគិតបានទៀតទេ»។

ជាមួយគ្នានេះ លោកបានបន្ថែមថា ប្រទេសចិន អ៊ីរ៉ង់ អំពើភេរវកម្ម និងការវាយប្រហារតាមអ៊ីនធឺណិត ក៏បានបង្កជាការគំរាមកំហែង នាពេលខាងមុខ ចំពោះសន្តិសុខជាតិរបស់ប្រទេសហូឡង់ផងដែរ។

បន្ទាប់ពីមានការរឹតបន្តឹងជាច្រើនឆ្នាំ ការជំរុញនេះធ្វើឲ្យការចំណាយលើវិស័យការពារជាតិរបស់ហូឡង់ស្ថិតនៅផ្លូវដែលបំពេញតាមកម្រិតអប្បបរមា ២ភាគរយនៃផលិតផលក្នុងស្រុកសរុប (GDP) ដែលជាលើកដំបូង គិតចាប់តាំងពីសម្ព័ន្ធមិត្តណាតូ បានយល់ព្រមលើកម្រិតនោះ កាលពី ១០ឆ្នាំមុន៕