បន្ទាប់ពីភាពចលាចលនយោបាយរយៈពេលពីរខែក្រោយការបោះឆ្នោតមុនអាណត្តិ ប្រធានាធិបតីបារាំង លោក អ៊ីម៉ានុយអែល ម៉ាក្រុង (Emmanuel Macron) កាលពីថ្ងៃព្រហស្បតិ៍ (០៥ កញ្ញា) បានតែងតាំងនាយករដ្ឋមន្ត្រីថ្មីគឺលោក មីស្ហែល បានីយ៉េ (Michel Barnier) ដែលបានសន្យាថានឹងបង្កើនកិច្ចសហការលើវិសាលគមនយោបាយ ប៉ុន្តែបានផ្តល់តម្រុយតិចតួចប៉ុណ្ណោះលើផែនការរបស់ខ្លួន។

អតីតប្រធានអ្នកចរចា ប្រេហ្ស៊ីត (Brexit - ការចាកចេញពីសហភាពអឺរ៉ុប) របស់សហភាពអឺរ៉ុប ដែលជាអ្នកអភិរក្សនិយមមិនសូវល្បីឈ្មោះនៅបារាំងបើទោះបីជាមានតួនាទីជារដ្ឋមន្ត្រីក៏ដោយរូបនេះ ប្រឈមមុខនឹងបញ្ហាដ៏លំបាកនៃការដឹកនាំច្បាប់តឹងតែងដូចជាថវិកាឆ្នាំ២០២៥ តាមរយៈសភាដ៏បែកបាក់ ខណៈស្ថិតនៅក្រោមការគំរាមកំហែងឥតឈប់ឈរនៃការដួលរលំ។

ជោគវាសនារបស់លោក Barnier និងលោក Macron ស្ថិតនៅជាមួយនឹងបក្សរួបរួមកម្លាំងជាតិ (RN) ស្តាំនិយមជ្រុលរបស់លោកស្រី ម៉ារីន ឡឺប៉ែន (Marine Le Pen) ដែលបានផ្តល់ការគាំទ្របណ្តោះអាសន្នដល់ការតែងតាំងរបស់លោក Barnier ប៉ុន្តែបក្សនេះបានបញ្ជាក់យ៉ាងច្បាស់ថា ខ្លួនអាចដកការគាំទ្រនៅពេលណាមួយ ប្រសិនបើការព្រួយបារម្ភរបស់ខ្លួនលើបញ្ហាអន្តោប្រវេសន៍ សន្តិសុខ និងថវិកាជាតិមិនត្រូវបានបំពេញ។

ក្នុងវ័យ ៧៣ឆ្នាំ លោក Barnier គឺជានាយករដ្ឋមន្ត្រីវ័យចំណាស់ជាងគេក្នុងប្រវត្តិសាស្ត្រនយោបាយទំនើបរបស់បារាំង ដោយបានចូលកាន់តំណែងបន្តពីលោក ហ្កាប្រ៊ីយែល អាតាល់ (Gabriel Attal) ដែលជានាយករដ្ឋមន្ត្រីវ័យក្មេងជាងគេ។ លោក Barnier បាននិយាយថា លោកនឹងទទួលស្តាប់ក្រុមនយោបាយទាំងអស់លើបញ្ហារួមដូចជាការថែទាំសុខភាព សន្តិសុខ និងការងារ ក៏ដូចជាការកាត់បន្ថយបំណុលលើសកម្រិតរបស់ប្រទេសជាអាទិភាព៕