បណ្ដាមេដឹកនាំអាហ្រ្វិករាប់សិបនាក់ បានជួបជុំគ្នាកាលពីថ្ងៃព្រហស្បតិ៍សប្ដាហ៍នៅទីក្រុងប៉េកាំងសម្រាប់កិច្ចប្រជុំកំពូលរយៈពេល៣ថ្ងៃទីថ្ងៃទី៤ដល់៦កញ្ញាសប្ដាហ៍នេះ ដែលបង្ហាញពីឥទ្ធិពលរបស់ចិននៅក្នុងទ្វីប ដែលខ្លួនសង្ឃឹមថានឹងក្លាយជាសម្ព័ន្ធមិត្តដ៏សំខាន់ក្នុងការរុញច្រានប្រឆាំងនឹងសណ្តាប់ធ្នាប់ពិភពលោកដឹកនាំដោយសហរដ្ឋអាមេរិក។

លោកប្រធានាធិបតីចិន Xi Jinping បានសន្យាជាមួយមេដឹកនាំទាំងនោះពីការផ្ដល់ជំនួយជាប្រាក់កម្ចីរាប់ពាន់លានដុល្លា និងការវិនិយោគលើវិស័យឯកជនក្នុងរយៈពេលបីឆ្នាំខាងមុខ និងបានលើកឡើង ថាមិត្តភាពជាមួយបណ្តាប្រទេសអាហ្វ្រិកទាំងអស់ ដែលមានទំនាក់ទំនងការទូតជាមួយប្រទេសចិន ត្រូវបានលើកកម្ពស់ រហូតដល់កម្រិតយុទ្ធសាស្ត្រ។

លោកបានថ្លែងក្នុងពិធីបើកវេទិកាស្តីពីកិច្ចសហប្រតិបត្តិការចិន-អាហ្វ្រិកថា យើងឈរប្រកៀកស្មាគ្នា ដើម្បីការពារសិទ្ធិ និងផលប្រយោជន៍ស្របច្បាប់របស់យើងយ៉ាងរឹងមាំ។

ប្រទេសចិន បានក្លាយជាតួអង្គសំខាន់មួយនៅក្នុងទ្វីបអាហ្រ្វិក ចាប់តាំងពីវេទិកានេះត្រូវបានបង្កើតឡើងក្នុងឆ្នាំ២០០០។ក្រុមហ៊ុនរបស់ខ្លួន បានវិនិយោគយ៉ាងច្រើនក្នុងការជីកយករ៉ែសម្រាប់ធនធានដែលឧស្សាហកម្មចិនត្រូវការ ហើយធនាគារអភិវឌ្ឍន៍របស់ខ្លួន បានផ្តល់ប្រាក់កម្ចីដើម្បីសាងសង់ផ្លូវដែក ផ្លូវថ្នល់ និងហេដ្ឋារចនាសម្ព័ន្ធផ្សេងទៀត ក្រោមកម្មវិធីខ្សែក្រវាត់ និងផ្លូវរបស់លោកXi។

ក្រុមមេដឹកនាំអាហ្រ្វិកបានស្វាគមន៍ជំនួយរបស់ចិន ប៉ុន្តែកំពុងជំរុញឱ្យមានការខិតកាន់តែជិតស្និទ្ធនៃជំនួយក្នុងគោលដៅអភិវឌ្ឍន៍របស់ទ្វីបនេះ។ ពួកគេកំពុងស្វែងរកឧស្សាហូបនីយកម្មសេដ្ឋកិច្ច និងពង្រីកការនាំចេញកសិផល ដើម្បីកាត់បន្ថយឱនភាពពាណិជ្ជកម្មជាមួយប្រទេសចិន ដែលបានក្លាយជាដៃគូពាណិជ្ជកម្មទ្វេភាគីដ៏ធំបំផុតនៅអនុតំបន់សាហារ៉ាអាហ្រ្វិក៕