រដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយក្នុងដំណើរទស្សនកិច្ចទៅកាន់ប្រទេសហៃទី កាលពីថ្ងៃព្រហស្បតិ៍ ថា លោកសង្ឃឹមថានឹងមើលឃើញក្រុមប្រឹក្សាបោះឆ្នោតមួយដែលនឹងត្រូវបានបង្កើតឡើងក្នុងពេលឆាប់ៗនេះ ដើម្បីរៀបចំការបោះឆ្នោត នៅក្នុងប្រទេសតំបន់សមុទ្រការ៉ាអ៊ីបមួយនេះ នៅឆ្នាំក្រោយ។

បន្ទាប់ពីជំនួបជាមួយអ្នកសម្របសម្រួលក្រុមប្រឹក្សាប្រធានាធិបតីបណ្តោះអាសន្ន លោក Edgard Leblanc Fils លោកBlinken បាននិយាយថា ពួកគេបានពិភាក្សាគ្នាអំពីក្រុមប្រឹក្សាបោះឆ្នោត។

ដំណើរទស្សនកិច្ចរបស់លោក Blinken ធ្វើឡើង ខណៈប្រទេសហៃទី បន្តប្រយុទ្ធប្រឆាំងជាមួយក្រុមជនអន្ធពាលហិង្សា ដែលបានដណ្តើកាន់កាប់ភាគច្រើននៅរដ្ឋធានី ហើយបានចាប់ផ្តើមរំកិលទៅកាន់តំបន់ក្បែរៗនោះ។

នាយករដ្ឋមន្ត្រី លោក Garry Conille បានពង្រីករដ្ឋក្នុងគ្រាអាសន្ន ដើម្បីគ្រប់គ្រងប្រទេសទាំងមូល។ មន្ត្រីនគរបាលកេនយ៉ា ដែលជាផ្នែកមួយនៃបេសកកម្មសន្តិសុខគាំទ្រដោយអង្គការសហប្រជាជាតិបានចាប់ផ្តើមមកដល់ប្រទេសហៃទី កាលពីខែមិថុនា។

សហរដ្ឋអាមេរិក គឺជាអ្នករួមចំណែកធំបំផុតក្នុងបេសកកម្មដែល លោក Henry បានស្នើសុំកាលពីឆ្នាំ២០២២ ដើម្បីជួយប្រយុទ្ធប្រឆាំងក្រុមជនអន្ធពាល និងទាមទារយកទឹកដីមកវិញ។

អ្នកនាំពាក្យរបស់នាយករដ្ឋមន្ត្រី លោក Garry Conille បាននិយាយថា ប្រទេសហៃទី បានពង្រីករដ្ឋក្នុងគ្រាអាសន្នរបស់ខ្លួនដើម្បីគ្រប់គ្រងប្រទេសទាំងមូល មួយថ្ងៃមុនពេលរដ្ឋមន្ត្រីការបរទេសអាមេរិក លោក Antony Blinken បានជួបជាមួយអាជ្ញាធរហៃទីនៅលើកោះនេះ។