ក្រសួងការបរទេសអាមេរិក បាននិយាយថា មន្ត្រីការទូតកូរ៉េខាងត្បូង និងសហរដ្ឋអាមេរិក បានគូសបញ្ជាក់អំពីកិច្ចសហប្រតិបត្តិការជិតស្និទ្ធ ក្នុងការរារាំងប្រទេសកូរ៉េខាងជើងពីការរកប្រាក់ចំណូល តាមរយៈសកម្មភាពអ៊ីនធឺណេតដែលបង្កការគំរាមកំហែង ក្នុងអំឡុងពេលកិច្ចពិភាក្សារបស់ពួកគេស្តីពីសន្តិសុខតាមអ៊ីនធឺណិត កាលពីថ្ងៃព្រហស្បតិ៍។

លោក លី ជុនអ៊ីល (Lee Jun-il) អគ្គនាយកទទួលបន្ទុកគោលនយោបាយឧបទ្វីបកូរ៉េ នៅក្រសួងការបរទេសនៃទីក្រុងសេអ៊ូល និងលោក សែធ ប៊េលី (Seth Bailey) តំណាងពិសេសរងរបស់សហរដ្ឋអាមេរិក បានដឹកនាំកិច្ចប្រជុំលើកទី៧នៃក្រុមការងារកូរ៉េខាងត្បូង-សហរដ្ឋអាមេរិក បានប្តេជ្ញាប្រឆាំងការគំរាមកំហែងតាមអ៊ីនធឺណិតរបស់កូរ៉េខាងជើង។

ក្រសួង បាននិយាយនៅក្នុងកំណត់ត្រាប្រព័ន្ធផ្សព្វផ្សាយថា៖«កិច្ចប្រជុំនេះ បានគូសបញ្ជាក់អំពីការបន្តកិច្ចសហការយ៉ាងជិតស្និទ្ធរវាងរដ្ឋាភិបាលសហរដ្ឋអាមេរិក និងកូរ៉េខាងត្បូង ដើម្បីបង្អាក់សមត្ថភាពរបស់កូរ៉េខាងជើងក្នុងការរកប្រាក់ចំណូលតាមរយៈសកម្មភាពអ៊ីនធឺណិតដោយការគំរាមកំហែង ដែលខ្លួនប្រើប្រាស់ដើម្បីផ្តល់មូលនិធិដល់កម្មវិធីអាវុធប្រល័យលោក ( WMD) និងមីស៊ីលបាលីស្ទីកខុសច្បាប់»។

ក្រសួង ក៏បានសង្កត់ធ្ងន់ថា ទីក្រុងសេអ៊ូល និងទីក្រុងវ៉ាស៊ីនតោន កំពុងបន្តសកម្មភាព «យ៉ាងទូលំ ទូលាយ» ដើម្បីការពារ និងរំខានដល់ការលួចបន្លំរូបិយប័ណ្ណគ្រីបតូរបស់កូរ៉េខាងជើង ដោះស្រាយចារកម្មតាមអ៊ីនធឺណិតរបស់ខ្លួនប្រឆាំងនឹងវិស័យការពារ បញ្ឈប់អ្នកសម្របសម្រួលភាគីទី៣ពីការធ្វើឲ្យប្រទេសកូរ៉េខាងជើង អាចបង្កើតប្រាក់ចំណូលខុសច្បាប់ និងរុះរើហេដ្ឋារចនាសម្ព័ន្ធ និងបណ្តាញបុគ្គលិកផ្នែកព័ត៌មានវិទ្យា (IT)របស់កូរ៉េខាងជើង។