នគរបាលបាននិយាយថា យ៉ាងហោចណាស់សិស្សចំនួន ១៧នាក់ បានបាត់បង់ជីវិត បន្ទាប់ពីសាលារៀនមួយកន្លែង នៅកណ្តាលប្រទេសកេនយ៉ា ត្រូវបានអគ្គិភ័យឆាបឆេះ កាលពីយប់ថ្ងៃព្រហស្បតិ៍ (ទី៥ ខែកញ្ញា)។

ជាមួយគ្នានេះ មានការភ័យខ្លាចថា ចំនួនអ្នកស្លាប់អាចកើនឡើង ខណៈដែលមនុស្សរាប់សិបនាក់ផ្សេងទៀត ត្រូវបានបញ្ជូនទៅមន្ទីរពេទ្យ ដោយមានការរលាកធ្ងន់ធ្ងរ។

អ្នកនាំពាក្យនគរបាលលោកស្រី Resila Onyango បានប្រាប់ប្រព័ន្ធផ្សព្វផ្សាយក្នុងស្រុកថា មូលហេតុនៃការឆេះនៅសាលាបឋមសិក្សា Hillside Endarasha ក្នុងតំបន់ Nyeri កំពុងត្រូវបានស៊ើបអង្កេត។

លោកស្រី Onyango បានបន្ថែមថា ក្រុមអ្នកស៊ើបអង្កេតត្រូវបានបញ្ចូនទៅកាន់សាលានោះ។ រីឯកាកបាទក្រហមកេនយ៉ា បានប្រាប់ថា ខ្លួនកំពុងផ្តល់ការគាំទ្រផ្នែកចិត្តសាស្រ្ត សេវាខាងក្រៅដល់សិស្ស គ្រូ និងគ្រួសារដែលរងផលប៉ះពាល់ ហើយបានបង្កើតតុតាមដាន នៅសាលា។

គួរបញ្ជាក់ថា អគ្គិភ័យតាមសាលា គឺជារឿងធម្មតា នៅក្នុងសាលារៀនដែលផ្ដល់ការហូបចុក និងកន្លែងសម្រាក នៅកេនយ៉ា។ ក្នុងឆ្នាំ២០១៧ សិស្ស ១០នាក់ បានស្លាប់ ក្នុងការវាយប្រហារដោយដុត នៅវិទ្យាល័យ Moi Girls ក្នុងរដ្ឋធានីណៃរ៉ូប៊ី។

ហើយយ៉ាងហោចណាស់សិស្ស ៦៧នាក់ បានបាត់បង់ជីវិត នៅក្នុងតំបន់ Machakos ភាគអាគ្នេយ៍នៃទីក្រុងណៃរ៉ូប៊ី ក្នុងហេតុការណ៍ដុតសាលារៀន នៅប្រទេសកេនយ៉ា ដែលបានកើតឡើងជាង ២០ឆ្នាំមុន៕