អតីតអភិបាលក្រុងហ្វីលីពីន លោកស្រី Alice Guo ដែលត្រូវបានចោទប្រកាន់ពីបទមានទំនាក់ទំនងជាមួយក្រុមជនខិលខូចចិន និងសម្ងាតលុយកខ្វក់ជាង ១០០លានប៉េសូ (១,៧៩លានដុល្លារអាមេរិក) បានទៅដល់ទីក្រុងម៉ានីលហើយ នៅព្រឹកថ្ងៃសុក្រ (ទី៦ ខែកញ្ញា) បន្ទាប់ពីត្រូវបាននិរទេសពីប្រទេសឥណ្ឌូនេស៊ី។

លោកស្រី Guo ដែលត្រូវបានគេស្គាល់ផងដែរថា ជាជនជាតិចិន ឈ្មោះ Guo Hua Ping ត្រូវបានចាប់ខ្លួនដោយអាជ្ញាធរឥណ្ឌូនេស៊ី កាលពីថ្ងៃពុធ (ទី៤ ខែកញ្ញា) បន្ទាប់ពីចាកចេញពីហ្វីលីពីន កាលពីខែកក្កដា។ លោកស្រីត្រូវបានព្រឹទ្ធសភាហ្វីលីពីនតាមស្វែងរក ដោយសារបដិសេធមិនបង្ហាញខ្លួន មុនមានការស៊ើបអង្កេតរបស់សភាទៅលើការចោទប្រកាន់ពីការមានទំនាក់ទំនងឧក្រិដ្ឋកម្មរបស់ខ្លួន។

ភ្នាក់ងារអនុវត្តច្បាប់ហ្វីលីពីន ក្នុងនោះរួមទាំងក្រុមប្រឹក្សាប្រឆាំងការសម្អាតលុយកខ្វក់ (AMLC) ផងដែរ បានដាក់ពាក្យបណ្តឹងជាច្រើនករណីទៅក្រសួងយុត្តិធម៌ ទាក់ទងនឹងការសម្អាតលុយកខ្វក់ប្រឆាំងនឹងលោកស្រី Guo និងមនុស្ស ៣៥នាក់ផ្សេងទៀត។

លោកស្រី Guo ដែលនិយាយថា ខ្លួនជាពលរដ្ឋហ្វីលីពីនដោយកំណើត បានបដិសេធការចោទប្រកាន់នេះដោយហៅការចោទប្រកាន់ទាំងនោះថា ជាគំនិតព្យាបាទ។ កាលពីថ្ងៃព្រហស្បតិ៍ (ទី៥ ខែកញ្ញា) ការិយាល័យអន្តោប្រវេសន៍របស់ទីក្រុងហ្សាការតា បាននិយាយថា លោកស្រីត្រូវបាននិរទេសចេញពីប្រទេសឥណ្ឌូនេស៊ី ពីបទបំពានច្បាប់អន្តោប្រវេសន៍។

អតីតអភិបាលក្រុងរូបនេះ បានទៅដល់ទីក្រុងម៉ានីលតាមយន្តហោះឯកជនមួយ អមដោយអាជ្ញាធរអនុវត្តច្បាប់ហ្វីលីពីន ក្នុងនោះរួមមានទាំងរដ្ឋមន្ត្រីមហាផ្ទៃរបស់ប្រទេស គឺលោក Benjamin Abalos Jr ដែលបានទទួលយកលោកស្រីពីអាជ្ញាធរឥណ្ឌូនេស៊ី នៅទីក្រុងហ្សាការតា កាលពីថ្ងៃព្រហស្បតិ៍៕