ប្រទេសកូរ៉េខាងត្បូងនឹងធ្វើឲ្យក្លាយជាកាតព្វកិច្ច សម្រាប់ក្រុមហ៊ុនផលិតរថយន្តអគ្គិសនី ក្នុងការបង្ហាញឈ្មោះក្រុមហ៊ុនផ្គត់ផ្គង់អាគុយ និងបច្ចេកវិទ្យាផលិតរបស់ពួកគេ ដែលជាកិច្ចខិតខំប្រឹងប្រែង ដើម្បីកាត់បន្ថយការព្រួយបារម្ភ អំពីបញ្ហាឆេះអាគុយរបស់រថយន្តអគ្គិសនី (EV)។

នៅក្នុងសេចក្តីថ្លែងការណ៍មួយ នាថ្ងៃសុក្រ (ទី៦ ខែកញ្ញា) នេះ ក្រសួងពាណិជ្ជកម្ម ឧស្សាហកម្ម និងថាមពល បានឲ្យដឹងថា វិធានការនេះមានគោលបំណង «ដោះស្រាយកង្វល់សាធារណៈ និងធានាសុវត្ថិភាពនៃយានយន្តអគ្គិសនី» បន្ទាប់ពីរថយន្ត EV បានកើតមានអគ្គិភ័យ កាលពីខែសីហា នៅឯចំណតរថយន្តក្រោមដី នាទីក្រុង Incheon ភាគខាងលិចនៃទីក្រុងសេអ៊ូល។

គួរដឹងថា ការបង្ហាញឲ្យដឹងទាំងស្រុងនូវក្រុមហ៊ុនផលិតអាគុយរបស់រថយន្ត EV គឺជាចំណាត់ការដ៏កម្រមួយរបស់ក្រុមហ៊ុនផលិតរថយន្ត ដោយសារព័ត៌មាននេះជាធម្មតាត្រូវបានរក្សាទុកជាសម្ងាត់ នៅជុំវិញពិភពលោក។ ជាមួយគ្នានេះ រដ្ឋាភិបាលក៏នឹងពន្លឿនផងដែរនូវការសាកល្បងប្រព័ន្ធបញ្ជាក់ សម្រាប់អាគុយរបស់រថយន្ត EV ត្រឹមខែតុលា ដោយលឿនជាងកាលបរិច្ឆេទដំបូង ដែលបានកំណត់យកខែកុម្ភៈ ឆ្នាំ២០២៥។

ក្រុមហ៊ុនផលិតរថយន្ត រួមមាន Hyundai Motor Co, Kia Corp និងក្រុមហ៊ុនកូរ៉េនៃក្រុមហ៊ុន Mercedes-Benz Group AG, BMW AG និង Tesla Inc បានចាត់វិធានការរួចហើយ ដើម្បីដោះស្រាយចំពោះការកើនឡើងនូវការភ័យខ្លាច អំពីសុវត្ថិភាពរបស់រថយន្ត EV

សូមបញ្ជាក់ថា ឧបទ្ទវហេតុកាលពីខែសីហា ដែលរថយន្ត Mercedes-Benz ១គ្រឿង បានឆេះនៅឯអគារផ្ទះល្វែងមួយខ្នង បាននាំឲ្យមានការជម្លៀសប្រជាជនចំនួន ២០០គ្រួសារ និងបានបង្កឲ្យមានការអំពាវនាវចាត់វិធានការតឹងរ៉ឹងរបស់រដ្ឋាភិបាលលើរថយន្ត EV៕