​បាល់ទាត់៖ ​កូនប្រុស​របស់​អតីត​កីឡាករ​អង់គ្លេស និង Manchester United, David Beckham បានបង្ហាញ​ខ្លួន​លើកដំបូង​ជាមួយ​ក្លិប​អាជីព​មួយ​នៅ​ក្របខណ្ឌ​លី​គ​ទី៣ របស់​សហរដ្ឋអាមេរិក​។ ​​Romeo Beckham បច្ចុប្បន្ន​វ័យ ១៩ឆ្នាំ​ដែល​ពាក់អាវ​មាន​ឈ្មោះថា Beckham នៅ​លើ​ខ្នង​បានចាប់ផ្តើម​អាជីព​ជាមួយ​ក្លិប​បាល់ទាត់ Fort Lauderdale កាលពី​ថ្ងៃអាទិត្យ​។

​​មិន​ខុសពី​ឪពុក​ឡើយ Romeo Beckham ក៏​លេង​តំណែង​ខ្សែបម្រើស្លាប​ស្តាំ​ដូច David Beckham ដែរ​។ ​Fort Lauderdale គឺជា​ក្រុម​បំរុង​របស់ Inter Miami ដែល​ស្ថិតក្រោម​ការគ្រប់គ្រង និង​វិនិយោគ​របស់​ឪពុក​ ខណៈ​ការបង្ហាញ​ខ្លួន​របស់ Romeo Beckham នោះ​គឺ​បាន​ត្រឹម​ស្មើគ្នា ២-២ ទល់នឹង South Georgia Tormenta​។​ ​Romeo ក៏បាន​រួម​ក្រុម​ជាមួយ Harvey Neville ផងដែរ​ដែលជា​កូនប្រុស​របស់​គ្រូបង្វឹក Inter Miami, Phil Neville ដែលជា​មិត្ត​រួម​ក្រុម​របស់ David Beckham នៅ Manchester United​។

​​រំលឹកថា​ ឪពុក​របស់ Romeo គឺ David Beckham ធ្លាប់មាន​អាជីព​នៅ​ទឹកដី​អាមេរិក​នេះដែរ​ជាមួយ LA Galaxy ដោយបាន​ជួយ​ក្រុម​ឈ្នះ​ជើងឯក MLS Cups នៅ​ឆ្នាំ២០១១, ២០១២ និង ២០១៩ ក្នុង​រយៈពេល ៦ឆ្នាំ​ជាមួយ​ក្លិប​ដែលមាន​មូលដ្ឋាន​នៅ​ទីក្រុង Los Angeles មួយ​នេះ​៕

​អត្ថបទ​៖​នាង សុភា​វុ​ធ