អ្នកនាំពាក្យនៃក្រុមប្រដាប់អាវុធជនជាតិភាគតិចដែលកំពុងប្រយុទ្ធនឹងរបបយោធា នៅថ្ងៃសុក្រ (ទី៦ ខែកញ្ញា) នេះ បានប្រាប់សារព័ត៌មាន AFP ថា ការវាយប្រហារតាមអាកាសរបស់យោធាមីយ៉ាន់ម៉ា នៅភាគខាងជើងរដ្ឋ Shan បានសម្លាប់ជនស៊ីវិល ១១នាក់ ហើយ ១១នាក់ទៀត រងរបួស។

លោកស្រី Lway Yay Oo របស់កងទ័ពរំដោះជាតិ Ta'ang (TNLA) បាននិយាយថា៖ «ពួកគេបានទម្លាក់គ្រាប់បែក នៅតំបន់ ២ ក្នុងទីក្រុង Namhkam នាថ្ងៃទី៦ ខែកញ្ញា នៅវេលាប្រហែលម៉ោង ១ព្រឹក (ម៉ោងក្នុងស្រុក)»។

លោកស្រីបានប្រាប់ថា ការវាយប្រហារនេះបានសម្លាប់មនុស្ស ១១នាក់ ហើយ ១១នាក់ទៀត រងរបួស ដោយលោកស្រីបានបន្ថែមថា ការិយាល័យរបស់គណបក្សនយោបាយ នៅមូលដ្ឋាន ត្រូវបានរងការខូចខាត។ លោកស្រីបានបញ្ជាក់ថា អ្នកស្លាប់ មានបុរស ៥នាក់ ស្ត្រី ៤នាក់ និងកុមារ ២នាក់។

ទីក្រុង Namhkam ស្ថិតនៅចម្ងាយប្រហែល ៥គីឡូម៉ែត្រពីព្រំដែនជាមួយខេត្ត Yunnan របស់ប្រទេសចិន ដោយក្រុមយុទ្ធជន TNLA បានអះអាងពីការគ្រប់គ្រងលើទីក្រុងនេះ បន្ទាប់ពីមានការប្រយុទ្ធគ្នាជាច្រើនសប្តាហ៍ក្នុងឆ្នាំ២០២៣។

គួរបញ្ជាក់ថា របបយោធា កំពុងប្រយុទ្ធទប់ទល់ក្រុមប្រដាប់អាវុធគ្រប់ទីកន្លែង ដែលប្រឆាំងនឹងរដ្ឋប្រហារឆ្នាំ២០២១ របស់ខ្លួន ហើយទាហានរបស់របបនេះ ត្រូវបានចោទប្រកាន់ពីបទបង្ហូរឈាម និងប្រើប្រាស់ការវាយប្រហារតាមអាកាស និងកាំភ្លើងធំ ដើម្បីដាក់ទណ្ឌកម្មសហគមន៍ជនស៊ីវិល៕