នៅថ្ងៃសុក្រនេះ ក្រុមរុករករបស់នាយកដ្ឋានព្រៃឈើ និងក្រុមអ្នកស្រុក បានបន្តប្រតិបត្តិការតាមចាប់សត្វឆ្កែចចកស៊ីសាច់មនុស្ស ក្រោយការវាយប្រហារថ្មីមួយទៀតនៅតំបន់ភាគខាងជើងប្រទេសឥណ្ឌា ។

គួរឲ្យដឹងថា ក្មេងអាយុ ១០ឆ្នាំម្នាក់ រងការវាយប្រហារពីសត្វឆ្កែចចកនៅក្រៅផ្ទះរបស់គេកាលពីថ្ងៃព្រហស្បតិ៍ម្សិលមិញ ។

ក្រុមមន្រ្តីនិយាយថា ពួកគេប្រើប្រាស់យានដ្រូនឈ្លបការណ៍ ដើម្បីរុករកទីន្លែងរស់នៅរបស់សត្វឆ្កែចចក ស្របពេលក្តីបារម្ភកើតមានចំពោះអ្នកស្រុកនៅទីក្រុង Bahraich ។

ក្រុមអាជ្ញាធរឥណ្ឌា ចាប់បានឆ្កែចចក ៤ក្បាលក្នុងចំណោមឆ្កែចចក ៦ក្បាលដែលបានសម្លាប់ក្មេងៗ ៦នាក់ និងស្រ្តីម្នាក់នៅរដ្ឋភាគខាងជើង Uttar Pradesh ក្នុងរយៈពេល ២សប្តាហ៍កន្លងមកនេះ ។

អំឡុងរដូវប្រាំង វាជារឿងធម្មតាទេសម្រាប់អ្នកភូមិនៅប្រទេសឥណ្ឌា ដេកលើកន្ទេល ឬគ្រែធ្វើពីខ្សែត្បាញនៅក្រៅផ្ទះរបស់ពួកគេ ជាទីដែលមានខ្យល់ត្រជាក់ ជាហេតុធ្វើឲ្យពួកគេងាយរងគ្រោះ ។

ស្របពេលដែលការវាយប្រហាររបស់សត្វខ្លា ត្រូវបានគេរាយការណ៍ជាញឹកញាប់នៅក្នុងប្រទេសឥណ្ឌានោះ ការវាយប្រហាររបស់សត្វឆ្កែចចក គឺជារឿងខុសពីធម្មតា ៕