ប្រដាល់សកល៖ ការប្រកួតកីឡាប្រដាល់សកលលក្ខណៈអាជីព Ultimate Boxing Championship 2021 លើកដំបូងបានបើកការប្រកួតជាផ្លូវការហើយ ដោយបញ្ចប់យ៉ាងរលូនកាលពីចុងសប្ដាហ៍កន្លងទៅ ខណៈមន្ដ្រីសហព័ន្ធមានសុទិដ្ឋិនិយមខ្ពស់ថា កម្មវិធីនេះគឺជាការបើកភ្លើងខៀវមួយ ដើម្បីជំរុញការអភិវឌ្ឍវិស័យកីឡាប្រដាល់សកលកម្ពុជាឲ្យកាន់តែរីកចម្រើន ដើម្បីត្រៀមការប្រកួតអន្ដរជាតិ ពិសេសត្រៀមការប្រកួតស៊ីហ្គេម។
សម្រាប់លទ្ធផលការប្រកួតសប្ដាហ៍ដំបូង បានបញ្ចប់ដោយលទ្ធផលឈ្នះ-ចាញ់ ៥គូ តែមាន ២គូចាញ់ដោយសន្លប់ ខណៈមាន ១គូស្មើគ្នា ក្នុងនោះម្ចាស់មេដាយសំរឹទ្ធស៊ីហ្គេម សៅ រង្សី ផ្ដួលកីឡាករ លីន សេងហុង និងកីឡាករ ថា រីវ៉ា ផ្ដួលកីឡាករ រិទ្ធ មរកា ឲ្យបោះបង់ការប្រកួតក្នុងទឹកទី១ ដូចគ្នា។ រីឯកីឡាករ អ៊ូច ធារិទ្ធ យកឈ្នះពិន្ទុ ពេជ្រ សំរឹទ្ធ, កីឡាករ ទូច ដេវីត ឈ្នះពិន្ទុ ស៊ឹម ពិសិដ្ឋ, កីឡាករ អំ ខេម ឈ្នះពិន្ទុ ហ៊ុនហួរ រីឯគូឯកចុងក្រោយកីឡាករ សែត សារិទ្ធ ស្មើពិន្ទុជាមួយកីឡាករ ម៉ាង ព្រហ្មម៉ាញ។ ក្រោយបញ្ចប់ការប្រកួតអគ្គលេខាធិការសហព័ន្ធកីឡាប្រដាល់សកលកម្ពុជា លោក ប៊ុយ សុភ័ណ្ឌ បានធ្វើកាករវាយតម្លៃខ្ពស់ចំពោះការខិតខំប្រឹងប្រែងរបស់កីឡាករម្នាក់ៗ ដែលជំរុញឲ្យការប្រកួតបញ្ចប់ដោយជោគជ័យ ទោះបីមានបញ្ហាបច្ចេកទេសបន្ដិចបន្ដួច។ តែយ៉ាងណាលោកថា នេះគឺជាការចាប់ផ្ដើម និងជាការផ្ដល់ឱកាសដ៏ល្អសម្រាប់កីឡាករក្នុងការបង្ហាញសមត្ថភាព និងអភិវឌ្ឍនូវបច្ចេកទេស ដើម្បីត្រៀមលក្ខណៈចូលរួមការប្រកួតលក្ខណៈអន្ដរជាតិ ពិសេសដំណើរឆ្ពោះទៅស៊ីហ្គេមឆ្នាំ២០២៣ នៅកម្ពុជា។
លោក ប៊ុយ សុភ័ណ្ឌ បានបញ្ជាក់ថា ក្នុងជំហានដំបូងនេះ សហព័ន្ធគ្រោងរៀបចំការប្រកួត ៦លើកចន្លោះពី ១សប្ដាហ៍ម្ដងទៅ ២សប្ដាហ៍ម្ដង ខណៈសប្ដាហ៍ទី២ គ្រោងប្រកួតនាថ្ងៃទី២៦ ខែកញ្ញាចុងសប្ដាហ៍នេះដោយមានការផ្សាយផ្ទាល់លើ Page ផ្លូវការរបស់សហព័ន្ធ ដោយមិនអនុញ្ញាតឲ្យទស្សនិកជនចូលទស្សនាផ្ទាល់ឡើយ។ ប៉ុន្ដែសម្រាប់ការបើកសករាជថ្មីនៃសង្វៀន Ultimate Boxing Championship 2021 គេក៏មានការចូលរួមលើកទឹកចិត្តផ្ទាល់ពីប្រធានសហព័ន្ធលោកសាស្ដ្រាចារ្យ ឆឹង យ៉ៅយ៉េន និងម្ចាស់ឧបត្ថម្ភធំលោក ខេស៊ី បាណេត នាយកវិទ្យាស្ថាន CamEd Business School ផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
