តេក្វាន់ដូ៖ បណ្ឌិត្យសភាតេក្វាន់ដូកម្ពុជាបានសហការជាមួយខេមរសហព័ន្ធតេក្វាន់ដូ WT រៀបចំវគ្គបណ្តុះបណ្តាលគ្រូបង្វឹកតាមអនឡាញឆ្នាំ២០២១ រយៈពេលវែងលើកដំបូងដោយមានសិក្ខាកាមជាគ្រូបង្វឹកចំនួន ១៨នាក់មកពី ៦រាជធានី-ខេត្តចូលរួម។
លោក ឆយ យ៉ុងសុក គ្រូឧទ្ទេសប្រចាំវគ្គបានឲ្យដឹងថា វគ្គបណ្តុះបណ្តាលនេះបានធ្វើឡើងរយៈពេល ១៩សប្ដាហ៍ចាប់តាំងពីខែមិថុនារហូតដល់ថ្ងៃទី២៤ ខែតុលា ឆ្នាំ២០២១ ដោយសិក្សារៀងរាល់ថ្ងៃសៅរ៍ ជាផ្នែកមួយនៃការអភិវឌ្ឍ និងជំរុញសកម្មភាពកីឡាតេក្វាន់ដូ WT តាមបណ្ដាលខេត្តឲ្យមានការរស់រវើក ទោះបីស្ថិតក្នុងបរិបទកូវីដ-១៩ ក៏ដោយ។ គ្រូបង្វឹកជនជាតិកូរ៉េដដែលបន្ដថា វគ្គនេះទទួលបានការឧបត្ថម្ភគាំទ្រពីភាគីកូរ៉េដើម្បីអភិឌ្ឍនកីឡាតេក្វាន់ដូ WT ដែលជាប្រភេទកីឡាអូឡាំពិក ដែលត្រូវតែជំរុញឲ្យមានសកម្មភាពនៅតាមរាជធានីខេត្ត ដែលមានក្លិបកីឡាតេក្វាន់ដូ និងផ្តល់ចំណេះដឹង បច្ចេកទេសកីឡានេះជូនគ្រូបង្វឹកតាមរយៈពេលអនឡាញ ដែលជាមធ្យោបាយមួយដ៏ល្អក្នុងបរិបទនេះ។
លោក ឆយ យ៉ុងសុក បានចាត់ទុកវគ្គនេះគឺជាវគ្គមួយដ៏សំខាន់ ដើម្បីផ្ដល់នូវចំណេះដឹង និងបច្ចេកទេសថ្មីៗដល់គ្រូបង្វឹកតាមបណ្ដារាជធានី-ខេត្តយកទៅអនុវត្តតាមក្លិបរបស់ខ្លួន ឆ្ពោះទៅរកការអភិវឌ្ឍប្រកបដោយគុណផលខ្ពស់ដល់កីឡាករ-កីឡាការិនី សម្រាប់ត្រៀមការប្រកួតអន្ដរជាតិ ពិសេសដំណើរឆ្ពោះទៅស៊ីហ្គេមឆ្នាំ២០២៣ នៅកម្ពុជា និងការប្រកួតអន្ដរជាតិផ្សេងៗទៀតដូចជាការប្រកួតកីឡាអូឡាំពិកជាដើម៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
