ព្យុះទីហ្វុង យ៉ាហ្គី (Yagi) ដែលជាព្យុះដ៏មានឥទ្ធិពលបំផុតរបស់អាស៊ីក្នុងឆ្នាំនេះ បានបោកបក់ឆ្ពោះទៅឆ្នេរសមុទ្រភាគខាងជើងនៃប្រទេសវៀតណាម នៅថ្ងៃសៅរ៍ (០៧ កញ្ញា) នេះបន្ទាប់ពីបានបង្កការបំផ្លិចបំផ្លាញខេត្តកោះ ហៃណាន (Hainan) ភាគខាងត្បូងប្រទេសចិន ហើយបានបណ្តាលឱ្យមនុស្ស ២នាក់ស្លាប់។

ប្រព័ន្ធផ្សព្វផ្សាយរដ្ឋចិនបាននិយាយនៅថ្ងៃសៅរ៍នេះដោយដកស្រង់សម្តីអាជ្ញាធរក្នុងតំបន់ថា ផ្គររន្ទះ ភ្លៀង និងខ្យល់បក់បោកខ្លាំង ដែលបានវាយប្រហារខេត្តហៃណាន ក៏បានបណ្តាលឱ្យមនុស្ស ៩២នាក់រងរបួសផងដែរ។ ព្យុះ Yagi បានបោកបក់ដល់ដីនៅកោះហៃណាន កាលពីថ្ងៃសុក្រ ជាមួយកម្លាំងខ្យល់អតិបរមា ២៣៤គីឡូម៉ែត្រក្នុងមួយម៉ោង នៅជិតចំណុចកណ្តាលរបស់វា ដោយបានបំបាក់ដើមឈើ និងជន់លិចផ្លូវ ហើយកាត់ផ្ដាច់ថាមពលដល់លំនៅឋានជាង ៨០០.០០០គ្រួសារ។

គិតត្រឹមម៉ោង ០៥:០០ព្រឹក (ម៉ោងសកល) នៅថ្ងៃសៅរ៍នេះ ព្យុះ Yagi កំពុងធ្វើដំណើរឆ្ពោះទៅភាគខាងជើងវៀតណាម លើឈូងសមុទ្រតុងកឹង (Tonkin)។ នៅក្នុងអាកាសយានដ្ឋានហាណូយ យន្តហោះជាច្រើនបានផ្អាកប្រតិបត្តិការ ជើងហោះហើរភាគច្រើនត្រូវបានលុបចោល និងមធ្យោបាយធ្វើដំណើរផ្សេងៗទៀតត្រូវបានប៉ះពាល់។ 

ព្យុះនេះបានកើនឡើងយ៉ាងខ្លាំងនៅចុងសប្តាហ៍ ក្លាយជាព្យុះស៊ីក្លូនត្រូពិចដ៏មានឥទ្ធិពលបំផុតរបស់ពិភពលោកក្នុងឆ្នាំ២០២៤។ ល្បឿនខ្យល់អតិបរិមាដែលបានបន្ធូរបន្ថយបន្តិចកាលពីថ្ងៃសៅរ៍ បានកើនឡើងម្តងទៀត ដោយឈានដល់ប្រភេទទី៤ ក្នុងល្បឿន ២១៦គីឡូម៉ែត្រក្នុងមួយម៉ោង នេះបើយោងតាមអាជ្ញាធរឧតុនិយមចិន៕