នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត់ (Paetongtarn Shinawatra) បាននិយាយនៅថ្ងៃសៅរ៍ (០៧ កញ្ញា) នេះថា រដ្ឋាភិបាលថ្មីរបស់លោកស្រីនឹងស្វះស្វែងរកការជំរុញសេដ្ឋកិច្ច «ភ្លាមៗ» ហើយនឹងបន្តជាមួយនឹងគោលនយោបាយរបស់អតីតនាយករដ្ឋមន្ត្រី លោក សេដ្ឋា ថាវីស៊ីន (Srettha Thavisin)។

លោកស្រីបានបើកកិច្ចប្រជុំគណៈរដ្ឋមន្ត្រីពិសេសមួយនៅព្រឹកថ្ងៃសៅរិ៍នេះ ដើម្បីរៀបចំគោលនយោបាយដែលនឹងត្រូវថ្លែងនៅក្នុងកិច្ចប្រជុំសភារយៈពេល ២ថ្ងៃនៅថ្ងៃព្រហស្បតិ៍ និងថ្ងៃសុក្រ សប្ដាហ៍ក្រោយ ដែលនឹងជាកិច្ចចាប់ផ្តើមជាផ្លូវការនៃការគ្រប់គ្រងរបស់ខ្លួន។ លោកស្រី ផែថងថាន ត្រូវបានបោះឆ្នោតជ្រើសរើសជានាយករដ្ឋមន្ត្រីដោយសភាតំណាងរាស្រ្តរបស់ប្រទេសថៃកាលពីខែមុន បន្ទាប់ពីការដកតំណែងដ៏គួរឱ្យភ្ញាក់ផ្អើលដោយតុលាការសម្រាប់ការរំលោភលើក្រមសីលធម៌របស់លោក សេដ្ឋា។

លោកស្រីបាននិយាយថា រដ្ឋាភិបាលរបស់ខ្លួននឹងបន្តជាចម្បងនូវគោលនយោបាយរបស់លោក សេដ្ឋា ជាមួយនឹងការកែសម្រួលមួយចំនួន។ នេះរួមបញ្ចូលទាំងការដោះស្រាយបញ្ហាដូចជាការរៀបចំរចនាសម្ព័ន្ធបំណុល ការគាំទ្រសហគ្រាសធុនតូច និងមធ្យម ព្រមទាំងការជំរុញវិស័យកសិកម្ម និងទេសចរណ៍។

កូនស្រីពៅរបស់អតីតនាយករដ្ឋមន្ត្រីដ៏មានឥទ្ធិពលលោក ថាក់ស៊ីន ស៊ីណាវ៉ាត់ (Thaksin Shinawatra) គឺលោកស្រី ផែថងថាន មិនធ្លាប់បានបម្រើការក្នុងរដ្ឋាភិបាលពីមុនមកទេ ហើយនឹងប្រឈមមុខនឹងការលំបាកជាច្រើនរាប់ចាប់ពីសេដ្ឋកិច្ចដែលកំពុងធ្លាក់ចុះ រហូតដល់លទ្ធភាពនៃការតតាំងផ្នែកច្បាប់ស្រដៀងទៅនឹងបណ្ដឹងបានទម្លាក់តំណែងលោក សេដ្ឋា ផងដែរ៕