យោធាទីក្រុងសេអ៊ូល បាននិយាយនៅថ្ងៃសៅរ៍ (០៧ កញ្ញា) នេះថា ប្រទេសកូរ៉េខាងជើង បានបង្ហោះបាឡុងដែលពោរពេញដោយសំរាមរាប់រយគ្រាប់បន្ថែមទៀតឆ្ពោះទៅកាន់កូរ៉េខាងត្បូង ជាភាពតានតឹងចុងក្រោយបង្អស់នៅក្នុងយុទ្ធនាការសងសឹកទៅមករបស់ប្រទេសទាំងពីរជុំវិញការបង្កហេតុ និងការឃោសនា។

អគ្គសេនាធិការចម្រុះរបស់កូរ៉េខាងត្បូងនិយាយថា កូរ៉េខាងជើងបានបាញ់បង្ហោះបាឡុងជាង ៩០០គ្រឿងក្នុងរយៈពេលបីថ្ងៃកន្លងមកនេះ រួមទាំងប្រហែល ១៩០គ្រឿងនៅយប់ថ្ងៃសុក្រ ហើយប្រហែល ១០០គ្រឿងបានធ្លាក់មកក្រោមរួចហើយ ដែលភាគច្រើននៅក្នុងទីក្រុងសេអ៊ូល និងខេត្ត ក្យ៉ុងជី (Gyeonggi) ភាគខាងជើង។

យោធាបាននិយាយថា ថង់ដែលភ្ជាប់ទៅនឹងបាឡុងទាំងនោះមាន “ភាគច្រើនជាក្រដាស និងកាកសំណល់ប្លាស្ទិក” ដោយបន្ថែមថា សំរាមទាំងនោះមិនបង្កហានិភ័យសុវត្ថិភាពដល់សាធារណជនឡើយ។ កូរ៉េខាងជើង បានបញ្ជូនបាឡុងពោរពេញដោយសំរាមជិត ៥.០០០គ្រឿងទៅកូរ៉េខាងត្បូងចាប់តាំងពីខែឧសភាមក ដោយនិយាយថាបាឡុងគឺជាការសងសឹកចំពោះការបាញ់បង្ហោះបាឡុង និងខិត្តបណ្ណឃោសនាប្រឆាំងកូរ៉េខាងជើងដោយសកម្មជនកូរ៉េខាងត្បូង។

ជាការឆ្លើយតប ទីក្រុងសេអ៊ូលបានផ្អាកកិច្ចព្រមព្រៀងយោធាកាត់បន្ថយភាពតានតឹងជាមួយទីក្រុងព្យុងយ៉ាង ហើយបានចាប់ផ្តើមឡើងវិញនូវការផ្សាយឃោសនាមួយចំនួនពីឧបករណ៍បំពងសម្លេងនៅតាមព្រំដែន។ យ៉ាងណាក៏ដោយ អ្នកស្រុកកូរ៉េខាងត្បូងមានអារម្មណ៍ «រំខានដោយប្រតិបត្តិការសម្អាតដ៏មមាញឹក និងបារម្ភអំពីការកើនឡើងនៃភាពតានតឹងកាន់តែគ្រោះថ្នាក់ជាងនេះ»៕