ភ្នំពេញ ៖ នារីជនជាតិចិន បើករថយន្តខ្វះការប្រុងប្រយ័ត្នជ្រុលបុកមនុស្ស​ដើរថ្មើជើងស្លាប់ម្នាក់ និងរេចង្កូតបុករះរថយន្ត៤គ្រឿង ត្រូវបានកម្លាំងជំនាញការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ បញ្ជូនទៅកាន់សាលាដំបូងរាជធានីភ្នំពេញ បើកការស៊ើបសួរតាមនីតិវិធី នាព្រឹកថ្ងៃទី២១ ខែកញ្ញា ឆ្នាំ២០២១នេះ។

គួររំលឹកថា កាលពីវេលាម៉ោង១០និង៥០នាទីព្រឹកថ្ងៃទី១៩ ខែកញ្ញា ឆ្នាំ២០២១ នារីជនជាតិចិនម្នាក់ បានបើករយថន្តស៊េរីទំនើបម៉ាកRANG ROVER ពណ៌សពាក់ស្លាកលេខភ្នំពេញ2AL-2013 ធ្វើដំណើរតាមបណ្ដោយមហាវិថីព្រះមុនីវង្ស ទិសដៅពីជើងទៅត្បូង ក្នុង​ល្បឿនលឿន​ ខណៈមក​ដល់​ចំណុចកើតហេតុ បានជ្រុលល្បឿន​ទៅបុកមនុស្ស​ដើរជើងម្នាក់​បណ្ដាលឲ្យ​បោកក្បាលស្លាប់ភ្លាមៗ នៅនឹងកន្លែងកើតហេតុ រួចរថយន្តរេចង្កូតទៅបុករះរថយន្ត៤គ្រឿង​ដែល​ចត​នៅចិញ្ចើមផ្លូវរងការខូចខាតបន្ថែមទៀត នៅចំណុចក្បែរក្រសួងអភិវឌ្ឍន៍ជនបទថ្មី តាម​បណ្ដោយ​មហាវិថីព្រះមុន្នីវង្ស មូលដ្ឋានសង្កាត់បឹងត្របែក ខណ្ឌចំការមន រាជធានីភ្នំពេញ។ បច្ចប្បន្ននារីជនជាតិចិនរូបនេះ កំពុងស្ថិតក្នុងដំណាក់កាលតំណាងអយ្យការបើកការស៊ើបសួរ៕

អត្ថបទ៖ កុម្ភៈ