មន្ត្រីក្នុងតំបន់ បាននិយាយនៅក្នុងសន្និសីទសារព័ត៌មានមួយកាលពីថ្ងៃសៅរ៍ថា មនុស្សជាង ១៤៩.000 នាក់ នៅក្នុងសង្កាត់ចំនួន ១៧ នៃទីក្រុង Wenchang ក្នុងខេត្តហៃណានភាគខាងត្បូងប្រទេសចិន ត្រូវបានជម្លៀស បន្ទាប់ពីព្យុះទីហ្វុង Yagi បានបោកបក់ដល់ទីក្រុងនេះ។

មន្ត្រីបាននិយាយថា ព្យុះទីហ្វុងនេះ បានធ្វើឲ្យមានការបំផ្លិចបំផ្លាញនៅក្នុងទីក្រុង ដោយផ្ទះជាង ២៥.០០0 ខ្នងត្រូវបានបំផ្លាញ ជិតមួយភាគបីនៃផ្លូវ មិនអាចធ្វើដំណើរការបាន ដោយសារតែដើមឈើរលំ ខ្សែភ្លើង ចំនួន១៣៩ខ្សែ ដែលមានថាមពល ១០ គីឡូវ៉ាត់ ត្រូវបានកាត់ផ្តាច់ និងស្ថានីយទំនាក់ទំនងចំនួន ៧៩២កន្លែង ត្រូវរងការខូចខាត។

អភិបាលរងក្រុង Wenchang លោក Wei Bo បាននិយាយថា៖«ចាប់តាំងពីល្ងាចថ្ងៃសុក្រ បន្ទាប់ពីការជួសជុលជាបន្ទាន់ ផ្លូវជាតិ ផ្លូវខេត្ត និងផ្លូវស្រុក ត្រូវបានបើកឲ្យធ្វើចរាចរជាមូលដ្ឋាន ការផ្គត់ផ្គង់ទឹកនៅក្នុងតំបន់ទីក្រុងសំខាន់ៗ ត្រូវបានស្តារឡើងវិញ ហើយថាមពល និងទំនាក់ទំនង ត្រូវបានស្តារឡើងវិញផងដែរ ។ 

ទីប្រជុំជន Longlou នៅក្នុងទីក្រុង Wenchang គឺជាតំបន់មួយដែលរងគ្រោះខ្លាំងបំផុតដោយព្យុះទីហ្វុង Yagi។ បុគ្គលិកផ្នែកអគ្គិសនី អគ្គិភ័យ និងអនាម័យក្នុងតំបន់ ត្រូវបានដាក់ពង្រាយ កាលពីព្រឹកថ្ងៃសៅរ៍ ដើម្បីសម្អាតផ្លូវ ក្នុងកិច្ចខិតខំប្រឹងប្រែង ដើម្បីស្តារជីវភាពរស់នៅធម្មតារបស់ប្រជាពលរដ្ឋ ឲ្យបានឆាប់តាមដែលអាចធ្វើទៅបាន។