រុស្ស៊ី បាននិយាយកាលពីថ្ងៃសៅរ៍ថា កងកម្លាំងរបស់ខ្លួន បានដណ្តើមកាន់កាប់ការតាំងទីលំនៅមួយបន្ថែមទៀតនៅតំបន់ដូណិតស្កិ៍ (Donetsk) ក្នុងរយៈពេល ២៤ ម៉ោងកន្លងមកនេះ ខណៈដែលអ៊ុយក្រែន បានរាយការណ៍នៅថ្ងៃតែមួយថា ស្ថានភាពនៅក្នុងជួរមុខនៃទីក្រុង Pokrovsk ត្រូវបានប្រសើរឡើង។ នេះបើយោងតាមការធ្វើបច្ចុប្បន្នភាពចុងក្រោយរបស់ពួកគេអំពីជម្លោះនេះ។

ក្រសួងការពារជាតិរុស្ស៊ី បានរាយការណ៍ថា ទាហានរុស្ស៊ី បានដណ្តើមគ្រប់គ្រងកន្លែងតាំងទីលំនៅ Kalinovo នៅតំបន់ដូណិតស្ក៍ ។ អង្គភាពអាកាសចរណ៍រុស្ស៊ី បានធ្វើការវាយប្រហារលើអាកាសយានដ្ឋានយោធាអ៊ុយក្រែន រោងចក្រផលិតគ្រឿងបន្លាស់យានដ្រូន និងមីស៊ីលតាក់ទិច ព្រមទាំងឃ្លាំងផ្ទុកអាវុធ   បរទេស។

ក្រសួងក៏បាននិយាយដែរថា កងកម្លាំងការពារអាកាសរុស្ស៊ី បានស្ទាក់ចាប់យានដ្រូនអ៊ុយក្រែនចំនួន ៣០ គ្រឿង។

ក្នុងរយៈពេល ២៤ម៉ោងកន្លងមកនេះ កងទ័ពរុស្ស៊ី បានសម្លាប់ និងបង្ករបួសដល់ទាហានអ៊ុយក្រែនចំនួន ២៨០នាក់ ក្នុងទិសដៅតំបន់ឃើស( Kursk) បានបំផ្លាញរថក្រោះអ៊ុយក្រែនចំនួន ៣គ្រឿង រថពាសដែកចំនួន ១០គ្រឿង កាំភ្លើងធំចំនួន ៩គ្រឿង រថយន្តដឹកជញ្ជូនចំនួន ៩ គ្រឿង និងគ្រឿងយុទ្ធោបករណ៍ ផ្សេងទៀត រួមទាំងឧបករណ៍សង្គ្រាមអេឡិចត្រូនិកផងដែរ។