អាជ្ញាធរសុខាភិបាលដែលមានមូលដ្ឋាន នៅតំបន់ហ្កាហ្សា បាននិយាយនៅក្នុងសេចក្តីថ្លែងការណ៍មួយកាលពីថ្ងៃសៅរ៍ថា ចំនួនអ្នកស្លាប់របស់ប៉ាឡេស្ទីនពីការវាយប្រហាររបស់អ៊ីស្រាអែលដែលកំពុងបន្តលើតំបន់ហ្កាហ្សាស្ទ្រីប បានកើនឡើងដល់ ៤០.៩៣៩នាក់ ហើយ។

សេចក្តីថ្លែងការណ៍ន៉ បានឲ្យដឹងថា ក្នុងរយៈពេល ៤៨ ម៉ោងកន្លងមកនេះ កងទ័ពអ៊ីស្រាអែល បានសម្លាប់ជនជាតិប៉ាឡេស្ទីនចំនួន ៦១នាក់ និង១៦២នាក់ទៀត បានរងរបួស នៅតំបន់ហ្កាហ្សាស្ទ្រីប ដែលនាំឲ្យចំនួនអ្នកស្លាប់ប៉ាឡេស្ទីនសរុប កើនឡើងដល់ ៤០.៩៣៩ នាក់ និងរបួសដល់ ៩១.៦១៦នាក់ ចាប់តាំងពី ជម្លោះប៉ាឡេស្ទីននិងអ៊ីស្រាអែល បានផ្ទុះឡើង នៅដើមខែតុលា ឆ្នាំ ២០២៣។  

កាលពីថ្ងៃសៅរ៍ យោធាអ៊ីស្រាអែល បានបន្តបើកការវាយប្រហារលើទីតាំងជាច្រើនកន្លែង ក្នុងតំបន់ហ្កាហ្សាស្ទ្រីប ដែលបណ្តាលឲ្យមនុស្សរាប់សិប នាក់ស្លាប់។ ក្រុមប្រដាប់អាវុធប៉ាឡេស្ទីន បានអះអាងថា បានចូលរួមក្នុងការប្រយុទ្ធជាមួយយោធាអ៊ីស្រាអែលនៅកន្លែងជាច្រើន ដោយបានកំណត់គោលដៅលើ  រថក្រោះ និងរថយន្តរបស់អ៊ីស្រាអែល។

ក្រសួងសុខាភិបាល ដែលមានមូលដ្ឋាននៅតំបន់ហ្កាហ្សា បាននិយាយថា សាលារៀនមួយនៅក្នុងជំរំជនភៀសខ្លួន Jabalia នៅភាគខាងជើង និងសាលារៀនមួយទៀត នៅជាយក្រុងហ្កាហ្សា គឺជាគោលដៅនៃការវាយប្រហាររបស់អ៊ីស្រាអែល ដែលបណ្តាលឲ្យមានអ្នកស្លាប់ និងរបួសជាច្រើននាក់។