សម្តេចប៉ាប ហ្វ្រង់ស៊ីស បានស្វាគមន៍អ្នកកាន់សាសនាប៉ាពួនូវ៉ែលហ្គីណេរាប់ពាន់នាក់ ក្នុងអំឡុងពេលពិធីបុណ្យមួយ នៅថ្ងៃអាទិត្យ (ទី៨ ខែកញ្ញា)នេះ ដែលប្រារព្ធធ្វើនៅក្នុងរដ្ឋធានី ផតធ៍ មូស( Port Moresby)។

ក្នុងពេលថ្លែងរបស់ព្រះអង្គ សម្តេចប៉ាប ហ្វ្រង់ស៊ីស បានធានាដល់មនុស្សរាប់ពាន់នាក់ ក្នុងការចូលរួមពីភាពស្និទ្ធស្នាលរបស់ព្រះ ទោះបីជាពួកគេរស់នៅក្នុងអ្វី ដែលអាចនឹងមានអារម្មណ៍ដូចនៅក្នុង«ដែនដីឆ្ងាយពីគ្នាយ៉ាងណាក៏ដោយ»។

អាជ្ញាធរក្នុងតំបន់ បាននិយាយថា មនុស្សប្រហែល ៣៥.000នាក់ បានបង្ហាញខ្លួនសម្រាប់ការជួបជុំដ៏ធំ ដែលបានធ្វើឡើង នៅឯពហុកីឡដ្ឋាន Sir John Guise ក្នុងរដ្ឋធានីផតធ៍ មូស។

បន្ទាប់ពីពិធីជួបជុំបានចប់ សម្តេចប៉ាប បានចេញដំណើរទៅក្រុង Vanimo ដើម្បីជួបជាមួយអ្នកផ្សព្វផ្សាយសាសនាកាតូលិក។

សម្តេចប៉ាប ហ្វ្រង់ស៊ីស កំពុងធ្វើទស្សនកិច្ចនៅប៉ាពួនូវ៉ែលហ្គីណេ ដែលជាផ្នែកមួយនៃការធ្វើដំណើររយៈពេល១២ ថ្ងៃទៅកាន់ប្រទេសចំនួន ៤។ សម្តេចប៉ាប បានចុះចតនៅ ប៉ាពួនូវ៉ែលហ្គីណេ កាលពីល្ងាចថ្ងៃសុក្រ (ទី៦ កញ្ញា) បន្ទាប់ពីដំណើរទស្សនកិច្ចទៅកាន់ប្រទេសឥណ្ឌូនេស៊ី ហើយនឹងស្នាក់នៅ រហូតដល់ថ្ងៃចន្ទ (ទី៩ កញ្ញា)។