ក្រុមអ្នករៀបចំកម្មវិធីបាននិយាយថា ប្រជាជនឥណ្ឌារាប់ពាន់នាក់ដែលភៀសខ្លួនទៅរស់នៅតាមប្រទេសជាច្រើនក្នុងពិភពលោក បានកំពុងតវ៉ានៅក្នុងទីក្រុងជាង ១៣០ នៅទូទាំង ២៥ប្រទេសនិងកោះកាលពីថ្ងៃអាទិត្យ ដើម្បីទាមទារយុត្តិធម៌បន្ទាប់ពីការរំលោភសម្លាប់លើវេជ្ជបណ្ឌិតហាត់ការម្នាក់នៅមន្ទីរពេទ្យក្នុងទីក្រុង Kolkata ប្រទេសឥណ្ឌាកាលពីខែមុននេះ។  

ការតវ៉ាបានចាប់ផ្តើមជាក្រុមធំៗ និងតូចៗ នៅទូទាំងប្រទេសជប៉ុន អូស្ត្រាលី កោះតៃវ៉ាន់ និងសិង្ហបុរី មុនពេលរីករាលដាលដល់ទីក្រុងនានាក្នុងប្រទេសនៅអឺរ៉ុបមួយចំនួន។ ផែនការតវ៉ាចំនួន៦០ត្រូវបានគ្រោងធ្វើនៅសហរដ្ឋអាមេរិក។   

សកម្មភាពតវ៉ាថ្មីៗទាំងនេះបានបន្ថែមពីលើការតវ៉ានានាដែលកំពុងបន្តនៅទូទាំងប្រទេសឥណ្ឌាបន្ទាប់ពីការសម្លាប់និស្សិតក្រោយថ្នាក់ឧត្តមសិក្សាវ័យ៣១ឆ្នាំ ផ្នែកវេជ្ជសាស្ត្រដើមទ្រូងកាលពីថ្ងៃទី ៩ខែសីហា។ 

នៅឯការតវ៉ាមួយក្នុងរដ្ឋធានី ស្តុកខុម (Stockholm) របស់ស៊ុយអែត ក្រុមស្ត្រីភាគច្រើនស្លៀកពាក់ខ្មៅបានប្រមូលផ្តុំគ្នានៅទីលានចតុរង្គហ្សឺហ្គេល ថូរីក (Sergels Torg) ដើម្បីច្រៀងចម្រៀងជាភាសា បង់ហ្កាលី (Bengali) និងកាន់ស្លាកសញ្ញាទាមទារការទទួលខុសត្រូវចំពោះឧក្រិដ្ឋកម្ម និងសុវត្ថិភាពសម្រាប់ស្ត្រីឥណ្ឌា។

លោក ឌីពីដ ចេន (Dipti Jain) ដែលជាអ្នករៀបចំការតវ៉ាជាសាកលបាននិយាយថា ព័ត៌មាននៃឧក្រិដ្ឋកម្មដ៏សាហាវនេះបានប្រព្រឹត្តលើវេជ្ជបណ្ឌិតសិក្ខាកាមវ័យក្មេងម្នាក់ ខណៈកំពុងបំពេញភារកិច្ច ហើយហេតុការណ៍នេះបានធ្វើឲ្យយើងគ្រប់គ្នាតក់ស្លុតណាស់ចំពោះភាពឃោរឃៅ និងការមិនយកចិត្តទុកដាក់ចំពោះជីវិតមនុស្ស៕