កាលពីថ្ងៃអាទិត្យ រុស្ស៊ី បាននិយាយថា កងកម្លាំងរបស់ខ្លួនបានរុលចូលទៅមុខនៅភាគខាងកើតអ៊ុយក្រែន ខណៈទីក្រុងគីវ បានរាយការណ៍ពីការវាយលុកតាមអាកាសយ៉ាងឃោឃៅ និងបានជំរុញឱ្យប្រទេសលោកខាងលិចអនុញ្ញាតឱ្យខ្លួន វាយប្រហារសងសឹកបន្ថែមទៀតចូលនៅក្នុងប្រទេសរុស្ស៊ី។

បណ្តាប្រទេសនានាបាននិយាយកាលពីថ្ងៃអាទិត្យថា យានដ្រូនវាយប្រហាររបស់រុស្សី ហោះហើរឆ្ពោះចូលទៅអ៊ុយក្រែន ដោយបានរំលោភលើដែនអាកាសរបស់ប្រទេសសមាជិកសម្ព័ន្ធយោធាណាតូ មានប្រទេសរូម៉ានី និងប្រទេសឡាតវី បង្កឱ្យមានការអំពាវនាវឱ្យមានការឆ្លើយតបរឹងមាំ ពីសំណាក់សម្ព័ន្ធមិត្តយោធា។

ទីក្រុងមូស្គូ បានបង្កើនការវាយលុកតាមអាកាសរបស់ខ្លួនក្នុងប៉ុន្មានសប្តាហ៍ថ្មីៗនេះ ប៉ុន្តែទីក្រុងនេះ ក៏កំពុងព្យាយាមប្រយុទ្ធប្រឆាំងទៅនឹងការវាយលុកឆ្លងព្រំដែនទ្រង់ទ្រាយធំរបស់អ៊ុយក្រែន ចូលទៅកាន់តំបន់ Kursk ភាគខាងលិចរបស់ខ្លួន ដែលបានផ្លាស់ប្តូរដំណើរនៃសង្រ្គាមរយៈពេលពីរឆ្នាំកន្លះ មកនេះ។

ទីក្រុងគីវ បានបើកការវាយលុកចូលតំបន់ Kursk នៅថ្ងៃទី៦ ខែសីហា ដោយសង្ឃឹមថានឹងបង្ខំរុស្ស៊ីឲ្យផ្លាស់ប្តូរការដាក់ពង្រាយកងទ័ពជាថ្មី ដែលកំពុងរុលឆ្ពោះទៅមុខនៅភាគខាងកើតប្រទេស។ ប៉ុន្តែទីក្រុងមូស្គូទំនងជាបង្កើនការវាយលុករបស់ខ្លួនចូលទៅទីនោះ។

កាលពីថ្ងៃអាទិត្យ យោធារបស់រុស្ស៊ី បានអះអាងថាដណ្តើមបានភូមិតូចមួយផ្សេងទៀតនៅលើផ្លូវឆ្ពោះទៅកាន់មជ្ឈមណ្ឌលដឹកជញ្ជូនដ៏សំខាន់នៃក្រុង Pokrovsk ក្នុងតំបន់ Donetsk ភាគខាងកើត។ ក្រសួងការពារជាតិរុស្ស៊ី បាននិយាយថា កងទ័ពរបស់ខ្លួន រំដោះបានតំបន់តាំងលំនៅ Novohrodivka ស្ថិតនៅចម្ងាយប្រហែល២០គីឡូម៉ែត្រ ពីក្រុង Pokrovsk ។

ក្រុងនេះ គឺជាការវាយដណ្តើមយកដែនដីដ៏ធំបំផុតមួយរបស់រុស្ស៊ីក្នុងប៉ុន្មានសប្តាហ៍ថ្មីៗនេះ ជាក្រុងដែលមានប្រជាជនជាង១៤.០០០នាក់រស់នៅមុនពេលទីក្រុងមូស្គូចាប់ផ្តើមការវាយលុកពេញលេញ នៅក្នុងខែកុម្ភៈ ឆ្នាំ២០២២។

ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីសប្តាហ៍មុនថា គោលបំណងសំខាន់របស់លោកនៅក្នុងប្រទេសអ៊ុយក្រែនបន្ទាប់ពីការប្រយុទ្ធគ្នារយៈពេល៣០ខែមកនេះ គឺដណ្តើមយកតំបន់ Donbas ភាគខាងកើត ដែលរួមមានទាំងតំបន់ Donetsk ។