ប្រទេសចិនបានជំរុញឲ្យហ្វីលីពីន «ពិចារណាឲ្យបានហ្មត់ចត់អំពីអនាគត» នៃទំនាក់ទំនង «ដែលស្ថិតនៅដំណាក់កាលដ៏សំខាន់នេះ» នៅក្នុងការអត្ថាធិប្បាយ នៅថ្ងៃចន្ទ (ទី៩ ខែកញ្ញា) ចេញផ្សាយដោយសារព័ត៌មាន People's Daily ជាសារព័ត៌មានរបស់បក្សកុម្មុយនីស្តដែលកំពុងកាន់អំណាច ដោយការលើកឡើងនេះកើតមានចំពេលមានភាពតានតឹង នៅសមុទ្រចិនខាងត្បូង។

គួរបញ្ជាក់ថា ប្រទេសហ្វីលីពីន និងចិន បានចោទប្រកាន់គ្នាទៅវិញទៅមកថា មានចេតនាបើកបុកនាវាឆ្មាំល្បាតសមុទ្រ នៅក្នុងផ្លូវទឹកដែលមានជម្លោះ ក្នុងប៉ុន្មានខែថ្មីៗនេះ ក្នុងនោះរួមទាំងការប៉ះទង្គិចគ្នាដោយហិង្សា កាលពីខែមិថុនា ដែលនាវិកហ្វីលីពីនម្នាក់បានរងរបួស ដោយដាច់ម្រាមដៃ។

ហេតុការណ៍ប៉ះទង្គិចគ្នា បានក្លាយជាដុំពពកខ្មៅបាំងកិច្ចខិតខំប្រឹងប្រែងរបស់ប្រទេសទាំង២ ក្នុងការកសាងទំនុកចិត្តឡើងវិញ និងគ្រប់គ្រងការប្រឈមមុខដាក់គ្នាឲ្យមានភាពកាន់តែល្អប្រសើរឡើង ក្នុងនោះរួមទាំងការបង្កើតបណ្ដាញទំនាក់ទំនងថ្មី ដើម្បីកែលម្អការដោះស្រាយជម្លោះដែនសមុទ្រផងដែរ។

ការអត្ថាធិប្បាយ បានលើកឡើងថា៖ «ទំនាក់ទំនងចិន-ហ្វីលីពីន កំពុងនៅស្ថិតលើផ្លូវបំបែក ពោលគឺនៅក្នុងដំណាក់កាលដ៏សំខាន់ ដោយត្រូវប្រឈមមុខជាមួយនឹងការជ្រើសរើសផ្លូវដែលត្រូវធ្វើដំណើរ។ ការសន្ទនា និងការពិគ្រោះយោបល់គ្នា គឺជាផ្លូវដ៏ត្រឹមត្រូវ ព្រោះថា គ្មានផ្លូវចេញពីជម្លោះណាមួយ ត្រូវបានធ្វើឡើងតាមរយៈការប្រឈមដាក់មុខគ្នានោះទេ»។

ការអត្ថាធិប្បាយនោះ បានបន្ថែមថា ទីក្រុងម៉ានីល «គួរតែពិចារណាឲ្យបានហ្មត់ចត់ អំពីអនាគតនៃទំនាក់ទំនងចិន-ហ្វីលីពីន និងធ្វើការជាមួយប្រទេសចិន ដើម្បីជំរុញទំនាក់ទំនងទ្វេភាគីឲ្យត្រឡប់មកនៅលើផ្លូវត្រូវវិញ»។ ការអត្ថាធិប្បាយនេះត្រូវបានបោះពុម្ពក្រោមចុងប៉ាកកាឈ្មោះ «Zhong Sheng» មានន័យថា «សំឡេងនៃប្រទេសចិន» ដែលជារឿយៗតែងត្រូវបានប្រើ ដើម្បីផ្តល់ទស្សនៈរបស់សារព័ត៌មាន ស្តីពីបញ្ហាគោលនយោបាយការបរទេស៕