អធិការបតីអាល្លឺម៉ង់ Olaf Scholz បានអំពាវនាវឲ្យមានកិច្ចខិតខំប្រឹងប្រែងជាថ្មី ដើម្បីនាំមកនូវសន្តិភាពដល់អ៊ុយក្រែន ដោយបន្ថែមថា លោក និងប្រធានាធិបតីអ៊ុយក្រែនលោក Volodymyr Zelensky បានព្រមព្រៀងគ្នា នៅក្នុងកិច្ចពិភាក្សានាពេលថ្មីៗនេះ ស្តីពីតម្រូវការសម្រាប់សន្និសីទសន្តិភាពថ្មីមួយ ដែលនឹងរួមបញ្ចូលប្រទេសរុស្ស៊ី។

នៅក្នុងបទសម្ភាសន៍មួយ លោក Scholz បានប្រាប់ទូរទស្សន៍ ZDF ថា៖ "ខ្ញុំជឿថា ឥឡូវនេះគឺដល់ពេលវេលា ដើម្បីពិភាក្សាពីរបៀបធ្វើយ៉ាងណាឲ្យឈានដល់សន្តិភាព ពីស្ថានភាពនៃសង្រ្គាមនេះ ពោលគឺពិតណាស់ត្រូវតែមានល្បឿនលឿនជាងមុន»។

គួរបញ្ជាក់ថា លោក Scholz កំពុងស្ថិតក្រោមសម្ពាធនៅក្នុងប្រទេស បន្ទាប់ពីគណបក្សទាំង៣ នៅក្នុងរដ្ឋាភិបាលចម្រុះឆ្វេងនិយមកណ្ដាលរបស់លោក បានទទួលរងបរាជ័យយ៉ាងធ្ងន់ធ្ងរ នៅក្នុងការបោះឆ្នោតតាមរដ្ឋក្នុងតំបន់ចំនួន២ កាលពីមួយសប្តាហ៍មុន ខណៈពេលដែលក្រុមដែលស្វែងរកទំនាក់ទំនងកាន់តែប្រសើរឡើងជាមួយទីក្រុងមូស្គូ ទទួលបានសំឡេងកាន់តែច្រើន។

លោក Zelensky បាននិយាយកាលពីខែកក្កដាថា លោកចង់មាននូវផែនការួចជាស្រេចមួយ ក្នុងខែវិច្ឆិកា ដើម្បីអនុញ្ញាតទីក្រុងគីវ រៀបចំកិច្ចប្រជុំកំពូលអន្តរជាតិលើកទី២ ស្តីពីសន្តិភាពនៅអ៊ុយក្រែន ហើយអ្នកតំណាងនៃប្រទេសរុស្ស៊ី គួរតែចូលរួម។

ប្រទេសអ៊ុយក្រែន កាលពីខែមិថុនា ធ្វើជាម្ចាស់ផ្ទះទទួលគណៈប្រតិភូមកពីប្រទេសចំនួន៩២ ក្នុងកិច្ចប្រជុំកំពូលលើកដំបូង ដែលរៀបចំនៅប្រទេសស្វីស ដើម្បីជំរុញដល់ផែនការសន្តិភាពរបស់ខ្លួន។ ប្រទេសរុស្ស៊ីដែលបានបើកការលុកលុយពេញលេញលើអ៊ុយក្រែន ក្នុងខែកុម្ភៈ ឆ្នាំ២០២២ មិនត្រូវបានអញ្ជើញឲ្យចូលរួមក្នុងព្រឹត្តិការណ៍ នាពេលនោះ ហើយបានបដិសេធថា គម្រោងនោះមិនជោគជ័យទេ៕