អ៊ីស្រាអែល បានប្រកាសកាលពីថ្ងៃអាទិត្យថា ខ្លួនបានបិទច្រកព្រំដែនទាំងបីរបស់ខ្លួន ជាមួយប្រទេសហ្ស៊កដានី បន្ទាប់ពីឆ្មាំសន្តិសុខអ៊ីស្រាអែលបីនាក់ ត្រូវបានគេរាយការណ៍ថា បានស្លាប់ នៅពេលព្រឹក នៅច្រកឆ្លងកាត់មួយ។

កាលពីព្រឹកថ្ងៃអាទិត្យ កងកម្លាំងការពារអ៊ីស្រាអែល (IDF) បាននិយាយថា អ្នកបើកបរម្នាក់ដែលបានចូលទៅជិតស្ពានអាលីនប៊ី ( Allenby) ដែលជាចំណុចព្រំដែនរវាងប្រទេសហ្ស៊កដានី និងតំបន់វេសបែង ( West Bank) ចេញពីខាងហ្ស៊កដានី បានចេញពីរថយន្តរបស់ខ្លួន ហើយបានបាញ់ប្រហារទៅលើឆ្មាំសន្តិសុខអ៊ីស្រាអែល ដោយបានឲ្យមនុស្ស៣នាក់ស្លាប់ នៅកន្លែងកើតហេតុ។

កងកម្លាំងការពារអ៊ីស្រាអែល (IDF) បានបន្ថែមថា អ្នកវាយប្រហារ ត្រូវបានបាញ់សម្លាប់ដោយកងកម្លាំងអ៊ីស្រាអែល។ ទូរទស្សន៍ Kan TV ដែលគ្រប់គ្រងដោយរដ្ឋរបស់អ៊ីស្រាអែល បានរាយការណ៍ថា ការចង្អុលបង្ហាញពីដំបូង បានបញ្ជាក់ថា ខ្មាន់កាំភ្លើងនោះ គឺជាជនជាតិហ្ស៊កដានី។

បន្ទាប់ពីការបាញ់ប្រហារនេះ អាជ្ញាធរអាកាសយានដ្ឋានអ៊ីស្រាអែល បាននិយាយនៅក្នុងសេចក្តីថ្លែងការណ៍មួយថា ខ្លួនបានបិទស្ពានអាលីនប៊ី ដែលត្រូវបានគេស្គាល់ជាផ្លូវការ នៅហ្ស៊កដានីថា ជាស្ពាន King Hussein រួមជាមួយនឹងផ្លូវកាត់ វ៉ាឌីអារ៉ាបា (Wadi Araba) ឬ យិតហ្សាក់ រ៉ាប៊ីន ( Yitzhak Rabin) រវាងទីក្រុងរមណីយដ្ឋានសមុទ្រក្រហមអេឡាត (Eilat)របស់អ៊ីស្រាអែល និងទីក្រុងអាខេបា (Aqaba) របស់ហ្ស៊កដានី និងច្រកឆ្លងកាត់ទន្លេហ្ស៊កដង់ ឬស្ពាន Sheikh Hussein រវាងទីក្រុងប៊េត សៀ ( Beit She'an) របស់អ៊ីស្រាអែល និងទីក្រុងអៀប៊ីត ( Irbid) របស់ប្រទេសហ្ស៊កដានី។