អគ្គនាយកអង្គការសុខភាពពិភពលោក (WHO) បាននិយាយកាលពីថ្ងៃអាទិត្យថា មនុស្សជាង ២០.000 នាក់ ត្រូវបានសម្លាប់ នៅក្នុងជម្លោះដែលកំពុងបន្តនៅក្នុងប្រទេសស៊ូដង់រវាងកងទ័ព និងកងកម្លាំងគាំទ្ររហ័ស (RSF) ចាប់តាំងពីខែមេសា ឆ្នាំ ២០២៣។

ថ្លែងនៅក្នុងសន្និសីទសារព័ត៌មានមួយក្នុងទីក្រុង Port Sudan ក្នុងអំឡុងពេលដំណើរទស្សនកិច្ចរយៈពេលពីរថ្ងៃ ទៅកាន់ប្រទេសស៊ូដង់ លោក តេដ្រូស អាដហាណុម ហ្គឺប្រ៊ីយេស៊ូស (Tedros Adhanom Ghebreyesus) បាននិយាយថា មនុស្សចំនួន ១០ លាននាក់ទៀត ត្រូវបានផ្លាស់ទីលំនៅ ក្នុងស្រុកបន្ថែមលើជនភៀសខ្លួនពីរលាននាក់ នៅក្នុងប្រទេសជិតខាង។

លោកបានបន្តថា៖«ទំហំនៃការសង្គ្រោះបន្ទាន់ គឺគួរឲ្យតក់ស្លុត ដូចជាសកម្មភាពមិនគ្រប់គ្រាន់ ដែលកំពុងត្រូវបានគេធ្វើ ដើម្បីទប់ស្កាត់ជម្លោះ និងឆ្លើយតបនឹងការឈឺចាប់ ដែលវាកំពុងបង្កឡើងនោះ»។

លោកបាននិយាយថា ស្ទើរតែពាក់កណ្តាលនៃចំនួនប្រជាជន ២៥លាននាក់របស់ប្រទេសស៊ូដង់ ត្រូវការអន្តរាគមន៍ជាបន្ទាន់ ខណៈដែល ៧០% នៃវិស័យសុខាភិបាលរបស់ប្រទេសនេះ លែងដំណើរការទៀត  ហើយ។

លោកប្រធានអង្គការសុខភាពពិភពលោក បានអំពាវនាវឲ្យ«ពិភពលោកភ្ញាក់ខ្លួនឡើង ហើយជួយប្រទេសស៊ូដង់ ឲ្យរួចផុតពីសុបិន្តអាក្រក់ ដែលខ្លួនកំពុងជួបប្រទះនេះ»។