នាយករដ្ឋមន្ត្រីអេស្ប៉ាញលោក Pedro Sanchez ត្រូវបានគេរំពឹងថា នឹងជួបជាមួយប្រធានាធិបតីចិន Xi Jinping នៅថ្ងៃចន្ទ (ទី៩ ខែកញ្ញា) នេះ ដោយសហភាពអឺរ៉ុប (EU) និងប្រទេសចិនស្ថិតនៅមាត់ជ្រោះនៃសង្រ្គាមពាណិជ្ជកម្ម ហើយទីក្រុងប៉េកាំងកំពុងត្រៀមសងសឹកទៅលើរថយន្ត និងសាច់ជ្រូករបស់អេស្ប៉ាញ ប្រសិនបើទីក្រុងប្រ៊ុចសែល ដំឡើងពន្ធលើរថយន្តអគ្គិសនី (EV) របស់ខ្លួន។

ទីក្រុងប៉េកាំង កាលពីខែមិថុនា បានព្រមានថា ការកើនឡើងនូវជម្លោះ ជាមួយ EU ជុំវិញរថយន្តអគ្គិសនីរបស់ខ្លួន អាចបង្កឲ្យមានសង្គ្រាមពាណិជ្ជកម្ម ដោយការលើកឡើងនោះមានត្រឹមតែប៉ុន្មានថ្ងៃបន្ទាប់ពីប្រទេសចិនបានបង្កើនភាពតានតឹង ដោយការប្រកាសពីការស៊ើបអង្កេត ប្រឆាំងនឹងការបង្ខូចថ្លៃ ចំពោះការនាំចូលសាច់ជ្រូករបស់អឺរ៉ុប។

ហើយក្នុងខែសីហា ប្រទេសចិន បង្កើនឲ្យមានហានិភ័យកាន់តែខ្ពស់ឡើងៗ ដោយចាប់ផ្តើមការស៊ើបអង្កេតលើការឧបត្ថម្ភធនទឹកដោះគោរបស់ប្លុកដែលមានសមាជិកទាំង ២៧ប្រទេសនេះ។ ករណីទាំង ២ នេះ បានធ្វើឲ្យជម្លោះរបស់ក្រុងប្រ៊ុចសែលជាមួយទីក្រុងប៉េកាំងកា្លយជាការទទួលខុសត្រូវរបស់លោក Sanchez។

ទិន្នន័យគយរបស់ចិន បានបង្ហាញថា ក្នុងឆ្នាំ២០២៣ ប្រទេសអេស្ប៉ាញ បាននាំចេញផលិតផលសាច់ជ្រូកតម្លៃ ១,៥ពាន់លានដុល្លារអាមេរិក ដែលចិននឹងស៊ើបអង្កេត ដោយច្រើនជាងប្រទេសចំណាត់ថ្នាក់ទី២ និងទី៣ គឺហូឡង់ និងដាណឺម៉ាក ដែលការនាំចេញរួមបញ្ចូលមានចំនួន ៦២០លានដុល្លារ និង ៦០៨លានដុល្លាររៀងគ្នា៕