កូរ៉េខាងត្បូងបានកោះប្រជុំកំពូលអន្តរជាតិមួយ នៅថ្ងៃចន្ទ(ទី៩ ខែកញ្ញា) នេះ ដើម្បីស្វែងរកការបង្កើតគ្រោងការ សម្រាប់ការប្រើប្រាស់ប្រកបដោយការទទួលខុសត្រូវនៃបញ្ញាសិប្បនិមិត្ត (AI) ក្នុងវិស័យយោធា ទោះបីជាកិច្ចព្រមព្រៀងណាមួយមិនត្រូវបានគេរំពឹងថា នឹងមានអំណាចចងជាកាតព្វកិច្ច ដើម្បីអនុវត្តវាក៏ដោយ។

ប្រទេសជាង៩០ ក្នុងនោះរួមទាំងសហរដ្ឋអាមេរិក និងចិន បានបញ្ជូនតំណាងរដ្ឋាភិបាលទៅចូលរួមកិច្ចប្រជុំកំពូលរយៈពេល ២ថ្ងៃនេះ នៅទីក្រុងសេអ៊ូល ដែលជាការជួបជុំលើកទី២។

នៅឯកិច្ចប្រជុំកំពូលលើកដំបូងត្រូវបានប្រារព្ធឡើងនៅទីក្រុង Amsterdam ប្រទេសហូឡង់ ក្នុងឆ្នាំ២០២៣ ជាកន្លែងដែលសហរដ្ឋអាមេរិក ចិន និងប្រទេសដទៃទៀតបានគាំទ្រដល់ «ការអំពាវនាវឲ្យមានវិធានការ» តិចតួច ដោយគ្មានការប្តេជ្ញាចិត្តផ្នែកច្បាប់។

រដ្ឋមន្ត្រីក្រសួងការពារជាតិកូរ៉េខាងត្បូង លោក Kim Yong-hyun បាននិយាយនៅក្នុងសុន្ទរកថាបើកថា៖ «ថ្មីៗនេះ នៅក្នុងសង្គ្រាមរុស្ស៊ី-អ៊ុយក្រែន យានដ្រូនដែលប្រើ AI បានដំណើរការយ៉ាងខ្លាំងក្លា»។

លោកកំពុងសំដៅទៅលើកិច្ចខិតខំប្រឹងប្រែងរបស់អ៊ុយក្រែន សម្រាប់ផ្នែកបច្ចេកវិទ្យាប្រឆាំងនឹងរុស្ស៊ីដោយការដាក់ឲ្យប្រើប្រាស់យានដ្រូនដែលមាន AI ដោយសង្ឃឹមថា ពួកគេនឹងជួយយកឈ្នះលើការជាប់គាំងនៃសញ្ញា ក៏ដូចជាធ្វើឲ្យយានដ្រូនធ្វើការជាក្រុមធំ៕