​អាមេរិក៖ សហរដ្ឋអាមេរិក​ និង​ចក្រភព​អង់គ្លេស​កំពុង​សម្លឹង​រ​ក​ការ​បន្ធូរ​បន្ថយ​ភាព​តានតឹង​ជាមួយ​បារាំង ​បន្ទាប់ពី​កិច្ចព្រមព្រៀង​នាវាមុជទឹក​ជាមួយ​អូស្ត្រាលី ​ដែល​ក្រុង​ប៉ារីស​បាន​ហៅថា​ជា​ការ​ “ចាក់​ចំ​ពីក្រោយ​ខ្នង​”។​

​ប្រធានាធិបតី​អាមេរិក​លោក Joe Biden កាលពី​ថ្ងៃអាទិត្យ​បាន​ស្នើសុំ​ការសន្ទនា​តាម​ទូរស័ព្ទ​ជាមួយ​ប្រធានាធិបតី​បារាំង​លោក Emmanuel Macron។ អ្នកនាំពាក្យ​របស់​ប្រធានាធិបតី​បារាំង​បាន​និយាយ​កាលពី​ថ្ងៃ​ចន្ទ​ថា​ ការ​ហៅ​ទូរស័ព្ទ​នេះ​នឹង​កើតឡើង​នៅ​ប៉ុន្មាន​ថ្ងៃ​ខាងមុខនេះ ហើយ​លោក Macron ចង់​ដឹង​ពី​ការ​ស្រាយ​បំភ្លឺ​នោះ​ដែរ។​ ចំណែក​ប្រទេស​បារាំង​វិញបាន​លុបចោល​ជំនួប​ជាមួយ​អង់គ្លេស ដោយសារ​ជម្លោះ​កិច្ចព្រមព្រៀង​នាវាមុជទឹក​នេះ​។ ​រដ្ឋមន្ត្រី​ក្រសួងការបរទេស​ម្នាក់​បាន​ទទួល​ស្គាល់ ​“ភាព​តានតឹង​” នៅ​ក្នុង​ទំនាក់ទំនង​រវាង​អង់គ្លេស​ជាមួយ​បារាំង ​បន្ទាប់ពី​ទីក្រុង​ប៉ារីស​បាន​លុបចោល​កិច្ចប្រជុំ​កម្រិត​ខ្ពស់​មួយ ​ដោយសារតែ​ខឹង​នឹង​កិច្ចព្រមព្រៀង​នាវាមុជទឹកអង់គ្លេស​-​អាមេរិក​-​អូស្ត្រាលី​។​

​មួយថ្ងៃ​បន្ទាប់ពី​ការ​ស្នើសុំ​របស់​លោក Biden នាយករដ្ឋមន្ត្រី​ចក្រភព​អង់គ្លេស​លោក Boris Johnson បាន​និយាយ​ថា ​លោក​មាន​មោទកភាព​យ៉ាង​ខ្លាំង ​ចំពោះ​ទំនាក់ទំនង​ប្រទេស​របស់​លោក​ជាមួយ​ប្រទេស​បារាំង​ហើយ​ថា​ “សេចក្តី​ស្រឡាញ់​របស់​យើង​ចំពោះ​ប្រទេស​បារាំង​គឺ​មិន​អាច​បំផ្លាញ​បាន​ឡើយ​”​។​ ​ការរៀបចំ​ថ្មី​នេះ​នឹង​ឃើញ​អូស្ត្រាលី​ទទួល​បាន​នាវាមុជទឹក​ដើរ​ដោយ​ថាមពល​នុយក្លេអ៊ែរ​ ដែល​ក្រុម​អ្នក​ជំនាញ​ខ្លះ​ហៅថា ​ជា​ការ​ប៉ុនប៉ង​របស់​ស​ហ​រដ្ឋ​អាមេ​រិក​ ដើម្បី​បង្កើន​ជំហរ​ប្រឆាំង​ចិន​នៅ​តំបន់​ឥណ្ឌូ​ប៉ាស៊ីហ្វិក​។​ ​ទីក្រុង​ប៉េកាំង​បាន​រិះគន់​យ៉ាងខ្លាំង​ ចំពោះ​កិច្ចព្រមព្រៀង​រវាង​សហរដ្ឋអាមេរិក ចក្រភព​អង់គ្លេស និងអូស្ត្រាលី ដែល​ត្រូវបាន​គេ​ស្គាល់​ថា AUKUS ដោយ​ហៅ​កិច្ចព្រមព្រៀង​នេះ​ថា ​ជា​កាយវិការ​គ្មាន​ទំនួល​ខុសត្រូវ​បំផុត​៕

អត្ថបទ៖ សុខមាន