កម្រិតទឹកនៅក្នុងទន្លេដែលហូរឆ្លងកាត់ព្រៃជប់ភ្លៀងអាម៉ាហ្សូន ប្រទេសប្រេស៊ីល បានធ្លាក់ចុះ ក្រោយគ្រោះរាំងស្ងួតជាប់កំណត់ត្រា បន្ទាប់ពីភ្លៀងធ្លាក់តិច ជាហេតុបង្កឲ្យមានការលំបាកខ្លាំងបំផុតពុំធ្លាប់មានពីមុនមកសម្រាប់ក្រុមកុលសម្ព័ន្ធ Ribeirinhos ដែលរស់នៅទីនោះ ។

 ពេលដែលទន្លេកាន់តែពិបាកធ្វើនាវាចរណ៍ ហើយទឹកកខ្វក់កាន់តែខ្លាំងពិបាកប្រើប្រាស់នោះ ពលរដ្ឋជាច្រើនដែលរស់នៅតាមច្រាំងទន្លេ ងាកមកពឹងផ្អែកលើការផ្គត់ផ្គង់ទឹកផឹកពីខាងក្រៅ ។

 លោក Francisca das Chagas គឺជាពលរដ្ឋមួយរូបរស់នៅតាមដងទន្លេអាម៉ាហ្សូន និយាយថា ជាពិសេសមនុស្សចាស់ បានជួបការលំបាកខ្លាំងណាស់ ដោយសារពួកគេត្រូវការដើរឆ្ងាយដើម្បីទៅរកទឹកស្អាតមកប្រើប្រាស់ ។

 តាមធម្មតា ក្រុមកុលសម្ព័ន្ធ Ribeirinhos ទទួលបានទឹកដោយផ្ទាល់ពីទន្លេ ឬប្រព័ន្ធតភ្ជាប់ទឹកផ្សេងទៀត ប៉ុន្តែមធ្យោបាយផ្គត់ផ្គង់ទឹកទាំងនេះ លែងមានទៀតហើយ នៅពេលដែលកម្រិតទឹកបានធ្លាក់ចុះយ៉ាងខ្លាំង ។

 បច្ចុប្បន្នប្រជាពលរដ្ឋជាច្រើន បានពឹងផ្អែកលើអង្គការក្រៅរដ្ឋាភិបាល ឬរដ្ឋាភិបាលប្រចាំរដ្ឋ សម្រាប់ការទទួលបានទឹកផឹក ។

 លោក Joao Ferreira គឺជាមេដឹកនាំសហគមន៍ និយាយថា ច្រាំងទន្លេមានចម្ងាយប្រហែល ៨០០ម៉ែត្រ ពីផ្ទះប្រជាពលរដ្ឋមួយចំនួន គឺជាចម្ងាយមួយពិបាកសម្រាប់មនុស្សចាស់ ឬអ្នកមានបញ្ហាសុខភាព ដើម្បីទៅស្វែងរកទឹក ។

 នៅក្នុងប្រទេសប្រេស៊ីល ជាកន្លែងដែលភ្លើងឆេះព្រៃ បានកើតឡើងនោះ កម្រិតទឹកទាប បានធ្វើឲ្យប៉ះពាល់ផងដែរដល់ការដឹកជញ្ជូនសណ្តែក និងពោត នៅតាមបណ្តាលរដ្ឋភាគកណ្តាល និងភាគខាងលិច ដូចជារដ្ឋ Mato Grosso ជាដើម ៕